एसिसी मिसा प्रिमियर कप : समुह विजेता नेपाः क्वाटरफाइनलय्

क्वालालम्पुर – नेपाः मलेसिया जुयाच्वंगु यु–१९ एसीसी मिसा प्रिमियर कपया क्वार्टरफानइलय् थ्यंगु दु । मंगलवाः जूगु समूह चरणया स्वंगूगु व लिपांगु कासाय् नेपाः हङकङयात बुकाः समूह विजेता जूगु खः । नेपालं हङकङयात १८१ रनया तःधंगु रन अन्तर बुकूगु खः । थ्वसिबे न्ह्यः नेपालं कतारयात १०५ व सिंगापुरयात १५१ रनं बुकूगु खः ।

नेपालं बिउगु २१२ रनया तःधंगु लक्ष्य ज्वनाः मैदानय् वःगु हङकङं निर्धारित २० ओभरय् ९ विकेटया क्षतिइ मुक्कं २९ रन जक दयेकूगु खः । हङकङया निंतिं वोङ विङ दकलय् अप्वः १३ रन दयेकूगु खःसा थ्व बाहेक हङकङया मेपिं सुं नं कासामि निगू अंकया रन दयेके मफुत ।
नेपाःया निंतिं कप्तान सोनी पाख्रिनं प्यंगू ओभर बलिङयासे प्यंगू विकेट काःगु खः । अथेहे मनिषा उपाध्यायं निगू, कृष्मा गुरुङ व स्नेहा महरां छगू छगू विकेट काःगु खः ।

न्हापा ब्याटिङ याःगु नेपालं निर्धारित २० ओभरय् खूगु विकेटया क्षतिइ २११ रन दयेकूगु खः । नेपाःया निंतिं कप्तान सोनी पाख्रिनं ६० बल म्हिताः १३ चौका व छगू छक्का प्रहार यासे ९० रन दयेकूगु खः । अथेहे सावित्रा धामीं ५२ व अलिशा यादव २३ रन दयेकूगु खः । सोनी व सावित्रां १३६ रनया साझेदारी याःगु खः ।