थौं देय्न्यंकं घौछि चक्का जाम
इन्धन मूल्यवृद्धि विरुद्ध नेवि संघ कुहां वल
येँ – प्रधानमन्त्री केपी ओलीया सरकार वयेवं लगातार हे प्यक्वः तक पेट्रोलियम पदार्थया भाः थकायेवं आः प्रमुख प्रतिपक्षी नेपाली कांग्रेस समर्थित विद्यार्थी संगठन नेवि संघ संघर्षय् कुहां वइगु जूगु दु । नेवि संघं इन्धनया भाः थकाःगु खँयात हे मुद्दा दयेकाः आः सरकार विरुद्ध आन्दोलन यायेगु तयारी याःगु खनेदु ।
थःपिनि आन्दोलनया न्हापांगु ज्याझ्वः कथं थौं बुधवाः न्हिनय् घौछि चक्का जाम यानाः सरकारयात सचेत यायेत्यंगु दु । थ्व चक्का जामया ज्याझ्वः देय्न्यंकं हे जुइगु खँ नं धाःगु दु । ७७ गुलिं जिल्लाया जिल्ला सदर मुकामय् थ्व चक्का जाम यायेगु ज्याझ्वः संघं दयेकूगु दु ।
थहां वंगु इन्धनया भाः क्वकायेगु लागिं नेवि संघं म्हिगः देय्या ७७ गुलिं जिल्लाया सीडीओतय्त ज्ञापनपौ नं लःल्हायेधुंकूगु दु । अन्तर्राष्ट्रिय बजारय् इन्धनया भाः कुहां वयाच्वंसां नेपालय् धाःसा लगातार भाः थकयाच्वन धासें थहां वंगु भाः तुरुन्त क्वमकाल धाःसा आन्दोलन यायेगु जुइ धकाः नं ज्ञापनय् ख्याच्वः बियातःगु दु ।
नेवि संघया सभापति नैनसिंह महरं सरकारं इन्धनया भाः क्वमकाःतले थःपिंसं आन्दोलन मदिकेगु खँ धयादीगु दु । थःपिंसं आन्दोलनया तयारी यानाच्वनागु बारे जानकारी बीत नेवि संघ विद्यार्थीतय्सं आपूर्तिमन्त्री मातृका यादवयात नं नापलानाः स्मरणपत्र बीधुंकूगु दु ।
आपूर्तिमन्त्रीयात ज्ञापनपत्र बिउ वंबलय् वय्कलं अन्तर्राष्ट्रिय बजाः भाः कथं समायोजन यानाबलय् इन्धनया भाः थहां वंगु खँ कनादीगु खः । तर नेवि संघ प्रतिनिधितय्सं अन्तर्राष्ट्रिय बजारय् थौंकन्हय् इन्धनया भाः थहां वनाच्वंगु मखु, कुहां वयाच्वंगु जानकारी बिसें थज्याःगु इलय् नं गय् यानाः भाः थहां वन धकाः न्ह्यसः तःगु खः ।
नेपाल आयल निगमं धाःसा अन्तर्राष्ट्रिय भाः स्वयां नं इण्डियन आयल कर्पोरेशनं छ्वया हःगु न्हूगु भाः कथं नेपालय् इन्धनया भाः थकायेमाःगु खँ धाःगु दु । नेपालय् स्वयां भारतय् चिकंया भाः थहां वनाच्वंगुलिं नेपाःया चिकं भारतपाखे हे चोरी निकासी जुयाच्वंगु खँय् भारतं आपत्ति क्यना वयाच्वंगु खः ।
बजाःभाः अनियन्त्रित
सरकारं इन्धनया भाः थकाःगु त्वहः चिनाः देय्या फुक्क वस्तुया भाः आकाझाकां वंगु दु । खास यानाः नकतिनि सार्वजनिक जूगु बजेटयात नं त्वहः दयेकाः थथे भाः थकाःगु खः । बजाःभाः लाथेपाथे ढंगं थहां वंसां उकियात नियन्त्रयण यायेगु लागिं धाःसा सरकारं छुं हे पलाः मल्ह्वंगु खँ धाःगु दु । इन्धनया भाः वनेवं ढुवानी खर्च अप्वयाः बजाःभाः थहां वनीगु खनेदु ।
LEAVE YOUR COMMENTS