लुँ काण्डय् लाक्वपाक्व समाचार च्वःपिं मिडियातय्त कारवाही

येँ (नेपालभाषा टाइम्स)- इतिहासय् हे दकलय् अप्वः परिमाणया लुँ ज्वंगु थ्व काण्डयात कयाः थनया सञ्चार माध्यमतय्सं धाःसा गैरजिम्मेवारीपूर्वक समाचार च्वयाच्वंगु द्वपं लाःगु दु ।

थ्व काण्डय् उपप्रधान लिसें गृहमन्त्री नारायणकाजी श्रेष्ठयात द्वपं बियाः सामाजिक सञ्जालय् च्वल धकाः एमालेलिसे सतीगु पत्रकारतय् संस्था प्रेस चौतारी नेपालया अध्यक्ष गणेश बस्नेत विरुद्ध गृह मन्त्रीया सचिवालयं साइबर ब्युरोेय् उजुरी तःगु दु । बस्नेतं फेसबुकय् ‘गृहमन्त्रीं ज्वना वःगु लुँ अर्थमन्त्रीं ज्वन’ धकाः स्टाटस च्वःगु खः ।

अथे हे थ्व लुँ हयेगु ज्याय् गृहमन्त्रीया ल्हाः दु धइगु आशय तयाः समाचार च्वःगु जनबोली न्यूज नेटवर्क विरुद्ध नं गृहमन्त्रीया सचिवालयं प्रेस काउन्सिलय् उजुरी दर्ता याःगु दु ।

मेखे म्हिगः पिहां वःगु ‘नयाँ पत्रिका’ न्हिपतिइ थ्व काण्डय् थःत स्वानाः समाचार च्वया हल धासें व्यापारी दीपक मलहोत्रां नं उगु न्हिपौ विरुद्ध मुद्दा तयेगु तयारी यानादीगु दु । म्हिगः मलहोत्रां छगू पत्रकार सम्मेलन यासें थ्व काण्डय् थःगु छुं हे ल्हाः मदु धकाः दावी यानादीगु खः ।

मेखे म्हिगः एअरपोर्टय् सुयां अनुमति मकासे लुँ काण्डया लाइभ प्रशारण याःपिं भारतीय टिभी इण्डिया डेली न्यूज च्यानलया निम्ह पत्रकारतय्त नं ज्वंगु दु ।