न्हूगु थारू आन्दोलन घोषणा

येँ – टीकापुर घटनाय् ज्वनातःपिं थारू अभियन्तातय्त आः तक नं कुनातःगु लिसें प्रत्यक्ष चुनावय् बहुमत हयाः त्याना वःम्ह थारू सांसद रेशम चौधरीयात मत्वःतूगु लगायतया खँयात कयाः थारूतय्सं तःधंगु आन्दोलनया तयारी याःगु दु । म्हिगः येँय् छगू पत्रकार सम्मेलन यासें थरुहट थारुवान राष्ट्रिय मोर्चां थुकिया बारे जानकारी बिउगु खः । पत्रकार सम्मेलनय् मोर्चाया संयोजक लिसें थारू नेता लक्ष्मण चौधरीं थारूत ताःई सुम्क च्वनं नं राज्यं उमिगु माग पूरा मयाःगुलिं आः आन्दोलन बाहेक मेगु विकल्प मदुगु खँ कनादीगु खः ।

लुमंकेबहः जू, वंगु वि.सं. २०७२ भदौ ७ गते कैलालीया टीकापुरय् राज्य पुनर्संरचना सम्बन्धी मुद्दायात कयाः थारूतय्सं याःगु आन्दोलनया इलय् नेपाल प्रहरीया एसएसपी लक्ष्मण न्यौपाने लगायत च्याम्ह प्रहरीत सीगु खः । अथे हे उकी लानाः मेपिं ४० म्ह प्रहरी घाःपाः जूगु खः । उगु घटना लिपा सरकारं अन कफ्र्यु तयाः आपालं स्थानीय थारूतय्गु छेँय् मि तयेगु ज्या याःगु खः । वहे द्वपनय् झिदँ दुम्ह मचा सहित ११ म्ह मनूतय्त ज्वनाः कुनातःगु दु । घटना लिपा भूमिगत जूम्ह थारू नेता रेशम चौधरी चुनावय् बहुमत हयाः विजयी जूगु खःसां वय्कःयात राज्यं ज्वनाः कुनातःगु दनि । वय्कःयात त्वःतकेगु लागिं यक्व कुतः जूसां नेतातय्सं त्वःतेगु ज्या धाःसा मयाःगुलिं थारूत आक्रोशित जुयाच्वंगु दु ।

थारूतय्सं आः थ्वहे वइगु माघ १५ गतेनिसें आन्दोलन शुरु यायेगु घोषणा याःगु दु । आन्दोलनया झ्वलय् १८ गते कैलालीइ वृहत् अन्तक्र्रिया याइगु ग्वसाः दुसा फागुन १ गते धनगढीइ आमसभा यानाः अन हे लक्ष्मण थारु लगायतं आमरण अनसन शुरु यायेगु ज्याझ्वः दयेकूगु दु । २ गते धनगढीइ विशाल प्रदर्शन यायेगु व अनं नं माग पूमवन धाःसा स्वन्हु तक बन्द यानाः आम हड्ताल व अनं लिपा अनिश्चित कालीन बन्द यायेगु ज्याझ्वः दयेकूगु दु ।