फास्ट ट्राय्क प्रभावित खोनाय् युनेस्को व आइएलओपाखें निरीक्षण

येँ (नेपालभाषा टाइम्स) – फास्ट ट्राय्क दयेकेगु नामय् खोनाय् स्थानीय जनताया जग्गा हड्पे यायेगु लिसें अनया सांस्कृतिक सम्पदा नष्ट जुइकथं न्ह्याकाच्वंगु ज्याखँया बारे न्यनेकने यायेत म्हिगः नेपाःस्थित निगू राष्ट्र संघीय निकाय युनेस्को व आईएलओया प्रतिनिधितय्सं खोना लागाया भ्रमण यात ।

युनेस्को व आईएलओया कन्ट्री डाइरेक्टरत निम्हं खोनाय् वयाः फास्ट ट्राय्क दयेकल धाःसा प्रभावित जुइगु स्थानीय जनताया बुँ लिसें थुकिं यानाः नष्ट जू वनीगु स्थानीय सांस्कृतिक सम्पदा बारे न्यनेकने याःगु खः । खोनाय् फास्ट ट्राय्क दयेकेगु ठेक्का नेपाली सेनायात बियातःगु दुसा सेनां स्थानीय जनताया खँ मन्यँसे बल हे प्रयोग यानाः लँ दयेकेगु कुतः यानाच्वंगु दु। उकिया विरोधय् स्थानीय जनतां आन्दोलन समेत याःगु खःसा उकियात स्थानीय प्रशासनं दमन यायेत स्वःगु खः ।

स्थानीय जनतां यानाच्वंगु उगु आन्दोलनया न्ह्यलुवा भाजु नेपाल डंगोलं कनादी कथं म्हिगः युनेस्को व आईएलओया प्रतिनिधिपिं खोनाय् करिब ५ घन्टा च्वनाः न्यनेकने याःगु खः । उगु इलय् वय्कःपिंसं आन्दोलन यानाच्वंपिं न्ह्यलुवापिं लिसें फास्ट ट्राय्कपाखें प्रभावित जूपिं स्थानीय किसानतय्त नं नापलानाः न्यनेकने यानादीगु खः । लिसें वय्कःपिंसं अन सेनां लँ दयेकाच्वंगु लागा नं निरीक्षण यानादीगु खः ।

युनेस्कोपाखें खोनाया सांस्कृतिक ऐतिहासिक कुदेश लागा नष्ट यायेत्यंगु बारे विशेष रुची तःगु खःसा आईएलओपाखें स्थानीय किसानतय् बुँज्या यानाः नयेमाःगु बुँ नष्ट यायेत्यंगु बारे अप्वः न्यनेकने याःगु खः । स्थानीय जनतां वय्कःपिंत राज्यपाखें श्वेत आतंक मच्चे यानाः जनताया जग्गा हड्पे यायेत्यंगु बारे थुकी लगानी यानाच्वंपिं विश्व बैंकया समेत ध्यानाकर्षण यायेत इनाप याःगु खः । अथे हे स्थानीय जनतां वय्कःपिंत खोनाया जनतायात फास्ट ट्राय्क आवश्यक मजू धासें जनतायात आवश्यक हे मजूगु विकासया योजना केन्द्रपाखें जबर्जस्ती लादे यायेत्यंगु खँ नं कंगु खः ।

युनेस्को व आईएलओया प्रतिनिधिपिंसं थुकिया बारे आः थःपिंसं अध्ययन यानाः माल धाःसा थःपिनिगु हे लेटरहेडय् नेपाल सरकारयात पौ छ्वयेगु खँ कनादीगु खः ।