प्रेस काउन्सिलय् पत्रकारिताया विद्यार्थी
येँ- पशुपति क्याम्पसय् पत्रकारिता विषयय् अध्ययन यानाच्वंपिं विद्यार्थीतय्सं प्रेस काउन्सिल नेपालया अवलोकन भ्रमण याःगु दु । क्याम्पसय् पत्रकारिता विषयय् स्नातक तह निगूगु दँय् अध्ययन यानाच्वंपिं विद्यार्थीतय्सं प्रेस काउन्सिल नेपालया अवलोकन भ्रमण याःगु खः ।
उगु इलय् प्रेस काउन्सिल नेपाल व विद्यार्थीतय् दथुइ छगू अनौपचारिक अन्तक्र्रिया नं जूगु खः । अन्तक्र्रियाय् प्रेस काउन्सिल नेपालया कार्यवाहक अध्यक्ष किशोर श्रेष्ठं पत्रकारिताया सैद्धान्तिक ज्ञान कयाः जक थुगु ख्यलय् दुहां वःसा बांलाइ धासें पत्रकारिताय आकर्षण व अवसदुगु धयादिल । लिसें वय्कलं उपयुक्त वातावरण मदुगुलिं पेशापाखें पलायन जुइगु यानाच्वंगु नं धयादिल ।
नेपाःया संविधानय् पूर्ण प्रेस स्वतन्त्रताया ग्यारेन्टी, च्वःगु वापतय् मिडिया खारेज मजुइगु व जेल वने म्वाःलीगु व्यवस्था जूसां नं थ्व पेशाया थःगु हे सीमा, आचारसंहिता दु, थुकियात हाचां गायेगु व सुनां छि, छ्या धाइकथंया पत्रकारिता याये मजिउगु नापं पत्रकारया म्हसीकापौ क्यनाः ठगे यायेगु, गैरकानुनी आपराधिक ज्या याये मजिउगु खँय् नं वय्कलं बः बियादिल ।
काउन्सिलया बोर्ड सदस्य खिलबहादुर भण्डारीं दक्वं पेशा व्यवसायय् कमि कमजोरी व बेथिति दु धासें पत्रकारिता ब्वनाः थःगु रुचिया विषय दयेकाः वनेगु खःसा म्हो इलय् याकनं सफलता काये फइ धयादिल ।
उगु इलय् काउन्सिलया उप प्रशासकीय अधिकृत रामशरण बोहरा, छापा माध्यम अनुगमन अधिकृत सुरेन्द्र मल्लं काउन्सिलय् वयाच्वंगु उजुरी, कारवाही व अनुगमनया थीथी पक्षयात कयाः जानकारी बियादीगु खः । पत्रकारिता विषय अध्ययन यानाच्वंपिं विद्यार्थीपिं निशा देउजा, प्रज्ञा पोखरेल थीथी जिज्ञासा तयादीगु खः ।
अवलोकन भ्रमणय् रामेछाप, डोटी, हुम्ला, मुगु, सुर्खेत, सिन्धुली, सिन्धुपाल्चोक, लमजुङ, दोल्खा, काभ्रे, कास्की लगायत थीथी जिल्लापाखें अध्ययन यायेत वयाच्वंपिं ४२ म्ह विद्यार्थीया सहभागिता दुगु खः ।
LEAVE YOUR COMMENTS