ने. सं. ११४४ कौलाथ्व पारू - नःलास्वनेगु

स्वरोजगारया निंतिं मिडिया तालिम

येँ(नेपालभाषा टाइम्स)- प्रशिक्षार्थी पत्रकारतय्त स्वरोजगार दयेकेगु उद्देश्यं संचालन जूगु ‘न्यू मिडिया’ तालिम क्वचाःगु दु । स्वनिगःया स्वंगुलिं जिल्लापाखें ब्वति काःपिं प्रशिक्षार्थी पत्रकारतय्त लक्षित यानाः उगु तालिम संचालन याःगु खः ।

मध्यपुर थिमि नगरपालिका व मध्यपुर संचार समाजया मंकाः ग्वसालय् छवाःयंकंया उगु तालिम जूगु खः । तालिमया झ्वलय् सहभागि प्रशिक्षार्थी पत्रकारतय्त रोजगारीमूलक न्यू मिडिया, खोज पत्रकारिता, फोटो पत्रकारिता बारे अध्यापन याकूगु खः।

तालिम समापन ज्याझ्वलय् नवासें मध्यपुर थिमि नगरपालिकाया प्रमुख सुरेन्द्र श्रेष्ठं वइगु आर्थिक दँय् संचारसम्बन्धी नीति हे दयेकाः न्ह्याः वनेगु जुइ धयादिल । स्थानीय सरकारया सुचंयात नगरवासीतक सहज रुपं थ्यंकेत, पूर्वाधार विकास व निर्माणया बारे जानकारी बीत नं संचारया अतिकं आवश्यकता दु धासें नगर प्रमुख श्रेष्ठं धयादिल, ‘जिपिं थःपिनिगु न्यादँया कार्यकाल सफल यायेत पञ्चवर्षीय योजना दयेकाः न्ह्याः वनाच्वनागु दु । उकिया निंतिं नगरपालिकां शिक्षा, स्वास्थ्य, विपद् व्यवस्थापन व सहकारी ऐन दयेकेधुंकूगु दु, तर थ्वबारे गनं, गुगुं मिडियाय् नं मवःगुलिं जिमिसं यानागु ज्याया बारे नगरवासी छुं नं मसिउ । आः वइगु दिनय् पत्रकार व संचार संस्थालिसे जानाः सहकार्य यानाः न्ह्याः वनेगु जुइ ।’

रोजगारीया पहिचान याये मफयाः थौं ल्याय्म्ह पुस्ता न्हियान्हिथं धइथे धमाधम विदेश पलायन जुयाच्वंगु व थुकथं विदेश वनीपिं ल्याय्म्हतय् ल्याखय् म्होति हयेगु ल्याखं नेपालय् हे न्यू मिडियापाखें स्वरोजगार जुइफु धइगु सन्देश बीकथं उगु तालिम संचालन यानागु समाजया अध्यक्ष बाबुकाजी साःछेँ श्रेष्ठं कनादिल ।

न्यू मिडिया अन्तर्गत युट्युब, फेसबुक, टिकटक थेंज्याःगु सामाजिक संजालयात सही सदुपयोग याये फत धाःसा आय आर्जन याये फइकथंया तालिम बिउगु खः । लिपांगु इलय् पोडकास्ट, ब्लगपोस्ट, भ्लग आदि दयेकाः जीविकोपार्जन याइपिं ल्याय्म्हतय् ल्याः अप्वयाच्वंगु दु । थ्व हे विषयया प्राविधिक व सैद्धान्तिक ज्ञानयात तालिमय् सहजीकरण याःगु खः ।

संचारकःमिपिं केके मानन्धर, सागर गुरागाइँ, सुमन श्रेष्ठ, विकेन रंजित लगायतं बियादीगु प्रशिक्षण समापनय् नगर उपप्रमुख विजयकृष्ण श्रेष्ठ, सामाजिक विकास शाखा प्रमुख तुलसीभक्त तः, कान्तिपुर पब्लिकेशनया विश्वेश्वर श्रेष्ठ, वरिष्ठ संचारकःमि ईश्वरलाल श्रेष्ठ, चन्द्रकृष्ण श्रेष्ठ लगायतया उपस्थिति दुगु खः ।