येँय् १० प्रतिशत छेँ नं पुनःनिर्माण मजुइगु चिन्ता

येँ – भुखाचं दुगुं येँया निजी छेँ हे आशा यानातःकथं दयेकेफुगु मदुनि । येँय् जक ४३ हजार ६०९ म्ह भुखाचं पीडित धलखय् लानाच्वंगु दुसा आःतक मुक्कं द्वःछि व ४७० खा जक छेँ पुनःनिर्माण जूगु दु । नगरपालिका मध्येय् कागेश्वरी मनोहराय् ५०, नागार्जुनय् १५३, येँमनपाय् ५७, गोकर्णेश्वरय् ५००, कीर्तिपुरय् २००, शंखरापुरय् ११०, बुढानिलकण्ठय् २००, टोखाय् ५० व चन्द्रागिरिइ १५० यानाः मुऽं १४७० खा छेँ जक पुनःनिर्माण जूगु दु ।

भुखाचं दक्षिणकाली व तारकेश्वरय् ला आःतक छखा छेँ नं पुनःनिर्माण मजुनिगु खँ राष्ट्रिय पुनर्निर्माण प्राधिकरणं धाःगु दु । कागेश्वरी मनोहराय् ३ हजार २१६, नागार्जुनय् ४ हजार ६९९, येँ मनपाय् ७ हजार १७१, दक्षिणकालीइ ३ हजार ३३१, गोकर्णेश्वरय् २ हजार ६००, तारकेश्वरय् ५ हजार ४६५, कीर्तिपुरय् २ हजार ६६१, शंखरापुरय् ५ हजार ४०९, बुढानिलकण्ठय् २ हजार ५४०, टोखाय् १ हजार ५९६ व चन्द्रागिरीइ ४ हजार ९२१ खा छेँ क्षति जूगु खः ।

येँय् हे पुनःनिर्माण लिबानाच्वंगु बारे प्राधिकरणं सोमवाः ‘निजी आवास पुनःनिर्माण अनुदान वितरण तथा निर्माणया लिपांगु अवस्था’ बारे स्थानीय तहया प्रमुख व उपप्रमुखलिसे सहलह ब्याकूगु खः । ज्याझ्वलय् प्राधिकरणया प्रमुख कार्यकारि अधिकृत युवराज भुसालं इन्जिनियर स्थानीय तहपाखें खटे जुइमाःगु, तर अझं जिल्ला आयोजना कार्यान्वयन एकाइ मातहतय् लानाच्वंगुलिं समस्या जूगु खँ धयादीगु खः ।

‘स्थानीय तह अन्तर्गत प्राविधिक कर्मचारी खटे जुइमाः, नगरपालिकाया कार्यकारि अधिकृतं हे इन्जिनियरयात ज्याय् लगे यात धाःसा जक पुनःनिर्माणया ज्या न्ह्याःवनी’ वय्कलं धयादीगु दु । भुखाचं पीडितपिंसं पुनःनिर्माणया निंतिं स्थानीय तहय् नक्सा पास यायेत निवेदन तःगु न्हय्न्हु दुने निःशुल्क पास यानाबीमाःगु व्यवस्था दु ।

प्राधिकरणया कार्यकारि समितिया दुजःपिं चन्द्रबहादुर श्रेष्ठ, हरिराम पराजुली व धु्रवप्रसाद शर्मां सार्वजनिक, सरकारी व वन क्षेत्रय् दयेकातःगु छेँ बाहेक मेमेगु थासय् च्वंगु छँे भुखाचं दुंगु जूसा पुनःनिर्माणया निंतिं सिफारिश, नक्सा पारित थेंज्याःगु ज्या सार्वजनिक मुचुल्काया आधारय् नं यायेफइगु खँ धयादीगु दु ।

कामपाया उपप्रमुख हरिप्रभा खड्गीं महानगरया मुख्य बजाः दुने यक्व गुथिया जग्गा दुगुलिं भुखाचं छेँ दुगुं स्वदँ बीत्ययेकाः नं जनता जस्ता क्वय् हे च्वनाच्वनेत बाध्य जुयाच्वंगु खँ कनादिल ।

‘शहरया दुने लागाय् गुलिखे छेँय् अझ नं टेका नकाः थनातःगु दनि । थज्याःगु छेँ चिचिधंगु लिभुखाय् जक ब्वल धाःसा दुनेफु । जोखिमय् हे पीडितत च्वनाच्वनेमाःगु बाध्य दु’ वय्कलं धयादीगु दु ।

शंखरापुर नगरपालिकाया प्रमुख सुवर्ण क्षेत्रं भुखाचं दुंगु छेँ मध्ये नगरपाखेया १० प्रतिशत छेँ नं दयेके मफइगु खः ला धयागु चिन्ता दुगु खँ कनादिल । ‘पुनःनिर्माणय् प्राविधिकया समस्या दु, गुबलें वइ, गुबलें वइमखु । किस्ता कायेखनीगु प्रक्रिया पूवंकेधुंकूपिंत नं कायेमखनीगु दयेकाबी । बंैकया कारणं नं निगूगु किस्ता कायेफयाच्वंगु मदु, सामान्य मनूतय्सं सहुलियत दरं त्यासा कायेमफु’ वय्कलं धयादिल । वय्कलं पुनःनिर्माणया सिँया नं अभाव जुयाच्वंगु खँ कनादिल ।

अथेहे तारकेश्वर नगरप्रमुख रामेश्वर बोहरां लाभग्राहीया आधारय् इन्जिनियर खटे मयाःगुलिं पुनःनिर्माणय् समस्या दुगु खँ धयादिल । चन्द्रागिरि नगरप्रमुख घनश्याम गिरीं लालपुर्जा मदुपिं भुखाचं पीडितपिंत स्थानीयवासीतय् सर्जमिनया आधारय् छँे दयेकेत स्वीकृति बियागु खँ कनादिल । लुमन्ति संस्थाया ग्वाहालिं जग्गा एकीकरण यानाः बस्ती दयेकेत स्वीकृति बियागु खँ कनादिल ।