नेपाःया विकास यायेत एमसीसी म्वाः

तीर्थराज वज्राचार्य,

नेपालय् एमसीसी लागू यायेत २०७४ भाद्र २९ गते अमेरिकाया वाशिंगटनस्थित एमसीसीया ज्याकुथिइ नेपाली कांग्रेसया नेतालिसें पुलांम्ह अर्थमन्त्री ज्ञानेन्द्रबहादुर कार्कीं एमसीसी सम्झौताय् ल्हाःचिं तयादीगु खः । केपी ओली नेतृत्वया सरकारया पालय् एमसीसी संसदय् सहलह यायेगु धाःसां जुइ धाःसा मफुत । केपी ओली सरकारपाखें चिले धुंकाः नेपाली कांग्रेसया सभापति शेरबहादुर देउवा प्रधानमन्त्री जुयादिल । शेरबहादुर प्रधानमन्त्री जुयादीधुंकाः वय्कःयात अमेरिकापाखें एमसीसी याकनं संसदपाखें पारित यायेमाःगु दबाव बिया वयाच्वंगु जुल ।

एमसीसी पारित जुल धाःसा नेपालय् देय्या कानून स्वयां अमेरिकाया कानून लागू जुइ । अमेरिकाया द्वलंद्वः सैनिक नेपाः वइ । हातहतियार भण्डार याइ । थः च्वनेत ल्वःगु जग्गा जमिन कब्जा याइ । एमसीसीपाखें न्ह्यागु ज्या यायेमाःसां नं नेपाल सरकारया अनुमति कयाच्वनीमखु । अःखबतं नेपाल सरकारं छुं यायेमाःसा एमसीसीयाके अनुमति कायेमालीगु व भारतया नं समर्थन दयेमाःगु आदि थज्याःगु घटिया प्रस्ताव सम्झौता संशोधन यायेु जक मखु, पूर्णरुपं हे खारेज यायेमाः ।

अमेरिकाया मुख्य उद्देश्य नेपाःया भूमिइ च्वनाः चीनयात घेराबन्दी यायेगु, पेले यायेगु नेपाः व चीनयात स्वापू स्यंकेगु, निगू देय्यात तापाकेगु नीति दयेकाच्वंगु खनेदु । थःगु देय्यात दमन याकाः चीन सरकारं नं सुम्क च्वनीमखु । अमेरिका व वया सैनिकयात दमन यायेत तयार जुयाच्वनी । जब निगू देय्या दथुइ युद्ध जुइ अले नेपाः युद्धभूमि बाहेकं मेगु छुं जुइ फइमखु । नेपाः देय् विकासया नामय् विनास जक जुइ । अमेरिकां नेपाःयात ५५ गू अर्ब ग्वाहालि यायेगु नामय् लोभलालच क्यनाः नेपाःयात गुलाम दयेकेत्यंगु धइगु खँ नेपाली जनतां बांलाक सीका व थुइका कायेधुंकूगु दु ।

नेपाःया भूमि सुरक्षित यायेत नागरिक समाज, महिला समूह, ज्ञानेन्द्र शाही, जनजाति संगठन, भूपू सैनिक समूह, हिन्दू धर्म अनुयायी समूह, स्वागत नेपाल, युवा विद्यार्थी संघ, नेपाल मजदुर किसान पार्टीं एमसीसी खारेज यायेमाःगु माग तयाः अमेरिकी राजदूतावासय् विज्ञप्ती बीगु नापं जुलुस तकं पिकायेधुंकूगु दु । अथे हे थीथी जिल्लाय् नं एमसीसी धोखा खः, राष्ट्रघाती ज्या खः धकाः विरोध प्रदर्शन यायेगु व आन्दोलन यायेगु याना वयाच्वंगु दु ।

श्रीलंका सरकारयात नं एमसीसी पास यायेत दबाव बियाच्वंगु खः । तर श्रीलंका सरकारं बांलाक अध्ययन यानाः थ्व एमसीसी राष्ट्रघाती खः । थुकिं देय्यात गुलाम याइ धइगु खँ थुइकाः एमसीसी सम्झौतायात संसदं खारेज यानाछ्वत । गथे श्रीलंका सरकारं एमसीसी संसदं अस्वीकार यानाः उकियात खारेज यानाछ्वःगु खः, अथे हे नेपाल सरकारं नं संसदं एमसीसी खारेज यानाः सकल नेपाःमि जनतायात सम्मान याये सयेकेमाः । थथे जुल धाःसा जक नेपाःमि जनतां सरकारयात सम्मान याइ ।

नेपाःया निंतिं अमेरिकी राजदूत ¥यान्डी बेरीं मन्त्री पम्फा भुसाल व सांसदतय्त नाप लानाः एमसीसी संसदं पारित यायेत दबाव बियाच्वंगु दु । हाकनं एमसीसीया उपाध्यक्ष फातेमा सुमार, सहायक उपाध्यक्ष जोनाथन ब्रुक्स नं थ्व हे इलय् नेपाःया भ्रमणय् वयाः राजनीतिक भेटघाटयात तीव्रता बिया हयाच्वंगु दु । वय्कःपिनिगु नेपाः भ्रमणया झ्वलय् प्रधानमन्त्री शेरबहादुर देउवा, नेकपा (माओवादी केन्द्र)या अध्यक्ष पुष्पकमल दाहाल, नेकपा (एमाले) अध्यक्ष केपी शर्मा ओली, नेकपा (एस)या अध्यक्ष माधवकुमार नेपालपिंत नाप लानाः एमसीसी पास याकेत तःधंगु हे षडयन्त्र जुयाच्वंगु खनेदु ।

नेपालं एमसीसी पास यायेगु धयागु देय्यात देय्यात सिरिया, अफगानिस्तान थेंज्याःगु देय् यायेगु बराबर जुइ । एमसीसी उपाध्यक्षपिं नेपालय् वये न्ह्यः एमसीसी पास याइपिं मन्त्री, सांसदतय्त छगू छगू पद बिउगु खनेदु । थुकिं यानाः एमसीसी विरुद्धया अभियानया अभियन्तातय् नेतृत्वकारी पुचःपाखें एमसीसी पास याइपिं मन्त्री, सांसदतय्त गुगुं हालतय् नं बाँकी तयेमखु धकाः ख्याच्वः बीधुंकूगु दु ।
उकिं नेपाःया निंतिं एमसीसी गुगुं हालतय् नं आवश्यकता मखु, मुख्य खँ देश बचे यायेगु खः, झी सकल नेवाःत छप्पँछधी जुयाः एमसीसीया विरोध यानाः देय् बचे यायेनु ।
बुद्ध जन्म जूगु देय् नेपालय् अमेरिकी साम्राज्यवाद व भारतया राज मजुइमा । सकल नेपाःमि जनता सुख, शान्तिपूर्वक च्वने दयेमा ।

सम्बन्धित बुखँ

LEAVE YOUR COMMENTS