ऐन मदयाः न्यायिक समिति प्रभावित
स्थानीय निकायया न्यायिक समितितय्त फैसला यायेत समस्या
येँ – देय्या थीथी स्थानीय निकायय् न्यायिक मामिला स्वयेगु जिम्मा उपप्रमुखयात बीगु निर्णय जुइवं अधिकांश स्थानीय निकायया न्यायिक मामिला स्वयेगु अधिकार मिसापिनि ल्हातय् लाः वःगु दु । छाय्धाःसां देय्या अधिकांश स्थानीय निकायया उपप्रमुख पदय् मिसापिं हे निर्वाचित जुयाच्वंगु दु ।
तर आवश्यक कानूनया अभावं यानाः अज्याःगु न्यायिक समितितय्त ज्या यायेत धाःसा थाकुयाच्वंगु खँ सम्बद्ध समितिया प्रमुखतय्सं धायेगु यानाच्वंगु दु । येँ महानगरपालिकाया न्यायिक समिति आवश्यक ऐन मदयाः समस्याग्रस्त जुयाच्वंगु खँ समितिया प्रमुख कानुनी अधिकृत हरिमाया घिमिरें ‘नेपालभाषा टाइम्स’ याना कनादिल ।
ऐन मदयाः छुं नं कथंया निर्णय कार्यान्वयन यायेत थाकुयाच्वंगु खँ कनादिसें वय्कलं छु ज्या यानागु वापत गुलि दस्तुर कायेगु धइगु तक हे निर्णय याये मफयाच्वंगु खँ कनादीगु दु । न्हापा स्थानीय स्वायत्त शासन ऐन कथं हे दस्तुर कायेगु ज्या जुयाच्वंगु खः । वय्कलं धयादी, ‘ऐन मदु, म्याद तामेली यायेगु ज्या तकं याये फयाच्वंगु मदु ।’
वइगु साउनंनिसें ऐन हयेगु कथं थम्हं ऐनया ड्राफ्ट दयेकाच्वनागु जानकारी बियादिसें वय्कलं न्यायिक समिति कार्यविधि ऐनया ड्राफ्ट तयार जुइधुंकूगु व उकियात आः नगरपरिषदं अनुमोदन याये ल्यं दनिगु खँ कनादिल । स्थानीय निकायया निर्वाचन धुंकाः नगरपालिका दुने आपालं ऐन दयेकेगु ज्या ल्यं दनिगुलिं नं न्यायिक समितिया ऐन नं दयेके मफयाच्वंगु खँ वय्कलं कनादिल ।
मेमेगु ऐन हयेत मनपाया निर्वाचित पदाधिकारीत गुलि हथाय् चायेगु यानाच्वंगु खः न्यायिक समितिया ऐन हयेत उलि हथाय् मचाःगुलिं थम्हं हे ऐन ड्राफ्ट यानागु खँ नं वय्कलं कनादिल । न्यायिक समितिं न्हिथं ज्या यानाच्वनागु जानकारी बियादिसें वय्कलं आः न्हापा ल्यनाच्वंगु ज्यायात प्राथमिकता बियाच्वनागु खँ नं कनादिल ।
स्थानीय निकायय् जनप्रतिनिधि मदुगु इलय् ल्यनाच्वंगु आपालं मुद्दा बारे हे निर्णय याये ल्यं दनिसा आः धमाधम उकिया हे ज्या जुयाच्वंगु दु । थुकिया नापनापं मनपाय् न्हून्हूगु मुद्दात नं धमाधम वयाच्वंगु दु । विशेष यानाः थौंकन्हय् परापूर्वकालंनिसें दयाच्वंगु लँ कायम यायेमाःगु, छेँया क्वथा खालि याये माःगु, सम्बन्ध विच्छेद यायेमाःगु व ज्याला मजदुरी सम्बन्धी मुद्दा अप्वः वयाच्वंगु दु ।
न्हापा स्थानीय स्वायत्त शासन अन्तर्गत दुगु मुद्दा आः स्वतः न्यायिक समितिइ वंगु खः ।स्थानीय निकायया न्यायिक समितियात अदालतं थें स्थानीय मुद्दाया फैसला यायेगु अदालती हक समेत बियातःगु दु ।
LEAVE YOUR COMMENTS