विद्यालय पूर्वाधार स्तरोन्नतिया निंतिं ब्वनेकुथियात आर्थिक ग्वाहालि
येँ(नेपालभाषा टाइम्स)÷येँ महानगरपालिकां जगतसुन्दर ब्वनेकुथिया विद्यालय पूर्वाधार स्तरोन्नतिया निंतिं पीन्यागू लख बराबरया आर्थिक ग्वाहालि याःगु दु । लायन्स क्लब अफ काठमाडौं हारतिमाताया समन्वयय् येँ महानगरपालिकां उगु आर्थिक ग्वाहालि याःगु खः ।
क्लबया हे समन्वयय् येँ महानगरं थगुने नं आर्थिक ग्वाहालि याःगु खः । थगुने ब्वनेकुथिया निंतिं नीगू लख आर्थिक ग्वाहालि याःगु खः । थगुने ब्वनेकुथिइ स्मार्ट बोर्ड, मल्टिमिडिया प्रोजेक्टर, कम्प्युटर, ल्याटपट, प्रिन्टर आदि ज्वलंया निंतिं २० गू लख ग्वाहालि याःगु खः ।
थुगुसी ब्वनेकुथिइ ट्रष्ट तयेत, क्वथा थप यायेत, फर्निचर, कार्पेट, पर्दालिसें विद्यालय भवन मर्मत सम्भारया निंतिं ४५ गू लख ग्वाहालि याःगु खः ।
विद्यालय संचालक समितिया नायः डा. चुन्दा वज्राचार्यं लसकुस यानादीगु ज्याझ्वलय् लायन्स क्लब अफ इन्टरनेशनल डिष्ट्रिक्ट गभर्नर दिनेशप्रसाद श्रेष्ठं संस्थापाखें नेपाःया शिक्षा ख्यलय् आवश्यककथं ग्वाहालि याना वयाच्वनागु जानकारी बियादीगु खः । लायन्स क्लब काठमाडौं हारतिमाताया नायः अशोकमान महर्जनं ‘छगू लायन्स क्लब, छगू विद्यालय ग्वाहालि’ ज्याझ्वः न्ह्याका वयाच्वनागु जानकारी बियादिल ।
येँ महानगरया निर्देशकलिसें वित्त विभाग प्रमुख बुद्धरत्न मानन्धर, ब्वनेकुथिया संस्थापक नापं कोषाध्यक्ष अनाररत्न वज्राचार्यं नं नुगःखँ तयादीगु ज्याझ्वलय् लायन्स क्लबलिसें ग्वाहालि यानादीपिं ब्वनेकुथिपाखें लुमन्तिं चिं व सुभाय् पौ लःल्हाःगु खःसा क्लबपाखें नं ब्वनेकुथियात लसता पौ लःल्हाःगु खः ।
LEAVE YOUR COMMENTS