राष्ट्रपति पौडेलं प्वंकल थःगु पीडा !
येँ (नेपालभाषा टाइम्स)÷संविधान दिवसय् कैदी बन्दी त्वःतेगु सरकारया सिफारिसय् हस्ताक्षर याःगु कारणं विवादय् लाःम्ह राष्ट्रपति रामचन्द्र पौडेलं म्हिगः थीथी सञ्चार माध्यमया सम्पादकत सःताः थःगु पीडा प्वंकादिल ।
उगु इलय् सम्पादकतय्सं जनताय् खनेदुगु निराशा, व्यवस्था प्रतिया आक्रोश, योगराज ढकाल ‘रिगल’ या कैद कट्टा प्रकरणबारे राजनीतिक दल व राष्ट्रपति संस्थायात कयाः आलोचन जूगु खँ न्ह्यथंगु खः । पत्रकारतय् खँ न्यनेधुंकाःलि राष्ट्रपति पौडेलं रिगल प्रकरणयात कयाः थः व राष्ट्रपति संस्थाया आलोचना जूगु बारे थः जानकार दु धासें रिगल प्रकरणय् राष्ट्रपतियात कयाः न्ह्यसः ब्वलंगु खँय् सरकारं स्पष्ट यायेमाःगु प्रष्टीकरण बियादीगु खः ।
वय्कलं धयादिल, ‘रिगल प्रकरण गुगु चर्चाय् वल, व प्रक्रिया पूवंकाः वःगु डकुमेन्ट खः । आम माफीया नितिं सिफारिस जूगु छुं नां ला जिं लित हे छ्वयागु खः । तर छम्ह छम्ह मनूया नामय् जिं मेहेनत याये मफुत, माले मफुत ।’ वय्कलं थःत ग्राण्टया रुपय् जक काये मते धकाः प्रधानमन्त्रीयात धयागु खँ नं अन कनादिल ।
थ्वहे झ्वलय् राष्ट्रपति पौडेलया भारतय् जूगु वासः याःगु खर्च वापत ५५ लाख तका सरकारं बिउगु निर्णय विरुद्ध सर्वोच्च अदालतं कारण देखाउ आदेश जारी याःगु दु । उगु निर्णय बदर यायेमाः धासें अधिवक्ता बिष्णुकुमार गिरीं सर्वोच्च अदालतय् रिट दर्ता याःगु खः । तर अन्तरिम आदेश माग याःसां नं उकियात धाःसा अस्वीकार याःगु दु ।
राष्ट्रपति रामचन्द्र पौडेल, राष्ट्रपतिया कार्यालय शीतल निवास, प्रधानमन्त्री तथा मन्त्रिपरिषदया कार्यालय, गृह मन्त्रालय, परराष्ट्र मन्त्रालय, अर्थ मन्त्रालययात विपक्षी दयेकाः रिट दायर याःगु खः ।
LEAVE YOUR COMMENTS