‘छंगु लिउ लिउ’ म्युजिक भिडियोया प्रिमियर

येँ(नेपालभाषा टाइम्स)- सामाजिक क्षेत्रय् क्रियाशील सानो पाइला नांया संस्थां नकतिनि दयेकूगु ‘छंगु लिउ लिउ’ म्येँया म्युजिक भिडियो प्रिमियर याःगु दु ।
सामाजिक अभियन्तालिसें म्युजिक भिडियोया कलाकार ज्यापुनी इन्दुया सभापतित्वय् जूगु ज्याझ्वलय् गायिका सरिता महर्जन मूपाहां व वरिष्ठ निर्देशक नापं कलाकार पवन जोशी विशेष पाहांकथं झाःगु खः । म्युजिक एरेन्जर बालकृष्ण वंशी, गायक सुरजवीर वज्राचार्य, राष्ट्रिय भूमि आयोग येँ जिल्लाया नायः श्यामकृष्ण प्रजापति नं पाहांकथं झाःगुु खः ।

म्युजिक भिडियोय् ज्यापुनी इन्दु, प्रविण अमात्य व मञ्जु श्रेष्ठ शाक्यं म्हितादीगु दुसा पवन जोशीं निर्देशन यानादीगु खः । ज्याझ्वलय् म्युजिक भिडियोया कलाकार, प्राविधिकलिसें प्रिमियर जूगु म्येया टिकटक दयेकादीपिंत नं हनापौ लःल्हाःगु खः ।

थुकथं हे ज्याझ्वलय् लाछि खिचाया स्याहार सुसार यायेगु ज्याय् क्रियाशील जुयाच्वनादीम्ह खिचाप्रेमी नासिर खान पठान नेवाःयात न्याद्वः तका दां ग्वाहालि याःगु खःसा म्युजिक भिडियो अप्वः शेयर याःम्हेसित सिरपाः द्यछायेगु नं घोषणा याःगु खः ।

सानो पाइला संस्था सम्पदा संरक्षण अभियानलिसें थीथी जात्रा पर्वय् भक्तजनपिंत लः त्वंकेगु ज्याय् सक्रिय सामाजिक संस्था खः ।