शनिवाः ‘जामनः गुभाजु’

येँ – ऐतिहासिक व्यक्तित्व जामनः गुभाजु बारे दयेकूगु नेपालभाषा संकिपाः ‘जामनः गुभाजु’या न्हापागु प्रिमियम शो थ्वहे वइगु शनिवाः क्यनीगु जूगु दु । बागबजारय् च्वंगु सिटीम्याक्स हलय् सुथय् ९ व १२ बजे निगू शो क्यनेगु तयारी जुयाच्वंगु दु ।

जेस्सी पेन्नि इन्टरटेनमेन्ट व द वाइल्ड बुल प्रोडक्सनपाखें दयेकूगु थ्व फिल्मया निर्देशन रवि साय्मिं यानादीगु दु । फिल्मया निर्देशक साय्मिया कथं थ्व फिल्मपाखें येँ देय्या नांजाःम्ह तान्त्रिक जामनः गुभाजु गज्याःम्ह व्यक्तित्व खः धयागु थौंया पुस्तां नं म्हसीकेफइ ।

लोकंह्वाःम्ह कलाकार सुशील राजोपाध्यायं च्वयादीगु धकिं बाखनय् दयेकूगु थ्व फिल्मय् भाजु राजोपाध्यायं हे जामनः गुभाजुया मू भूमिका म्हिताच्वनादीगु दु । फिल्मय् सरस्वती मानन्धर, उदेन न्हूसाय्मि, सुरज व्यवञ्जनकार थेंज्याःपिं कलाकारपिंसं नं म्हितातःगु दु ।