विरोध लिपा न्हूगु थासय् स्थलगत अध्ययन

ख्वप – सरकारं अन्तर्राष्ट्रिय रंगशाला दयेकेगु धयातःगु थाय्यात कयाः विवाद पिहां वयेवं आः हाकनं न्हूगु थाय् मालेगु प्रक्रिया न्ह्याःगु दु । न्हूगु थासय् रंगशाला दयेकेगु थाय् मालेगु निंतिं स्थलगत अध्ययन नं यायेधुंकूगु दु । सरकारं सूर्यविनायक नगरपालिका वडा नं. १० व चाँगुनारायण नगरपालिका वडा नं. ९ लय् लाःगु भकारीमूल धइगु थासय् अन्तर्राष्ट्रियस्तरया रंगशाला दयेकेगु धकाःताःई न्ह्यवंनिसें अध्ययन यानाः योजना तकं दयेकाच्वंगु खः ।

प्राविधिक पुचः हे खटे यानाः ज्या प्रारम्भिक चरणया ज्या न्ह्याका वयाच्वंगु खःसां लिपा नेपाल मजदुर किसान पार्टीया व्यापक विरोधया कारणं उगु थासय् रंगशाला दयेकेगु निर्णयपाखें सरकार लिचिउगु खः । न्हूगु थासय् रंगशाला दयेकेगु निंतिं प्रतिनिधिसभा सदस्य महेश बस्नेत नेतृत्वय् युवा व खेलकुद मन्त्री जगतबहादुर विश्वकर्मा, सचिव मोहनप्रसाद सापकोटा, राष्ट्रिय खेलकुद परिषद्या सदस्य सचिव केशवकुमार विष्टसहितया पुचलं सम्भावित स्वंगू थाय्या स्थलगत अध्ययन याःगु खः ।

उगु पुचलं सूर्यविनायक नगरपालिका–८या सिपाडोल, वडा नं. ४ या चित्रपुर व वडा नं. ९ या पलाँसे धइगु थासय् स्थलगत अध्ययन याःगु खः । सांसद बस्नेतं न्हापा रंगशाला दयेकेगु धयातगु थाय्यात कयाः विरोध यानाः नेमकिपां उगु थाय्या जक मखसे समग्र ख्वपवासीतय् विकास व भविष्ययात कयाः हे खेलवाड याःगु द्वपं बिउगु दु । नेमकिपा सांसद प्रेम सुवालं खेतीयोग्य जमीनय् रंगशाला दयेके मजिउ धयादीगु दु ।