
यल– यल महानगरपालिका १६ वडा कलाकार समितिया ग्वसालय् जूगु १६ वडाब्यापि म्यँे व हुलाप्याखं कासाय् म्येँपाखे स्वनिम्हया सक्षम शर्मां न्हाप जुलसा हुलाप्याखनय् न्याधःया श्रुयति शाक्य न्हाप जुल । म्यँे कासाय् महापाःया राधिका श्रेष्ठं ल्यू व जोमबहाःया यजु शिल्पकारं लियांल्यू सिरपा त्याकल । अथेहे हुलाप्याखनय् तःजाःफःया विशाखा शाक्यं ल्यू व झतापोलया एन्जेला शाक्यं लियांल्यू सिरपा त्याकल ।
कासाय् म्येँ व हुलाप्याखं विधाय् न्हाप लाःपिंत २५÷२५ हजार नगद, ल्यू लाःपिंत १५÷१५ हजार नगद, लियांल्यू लाःपिंत १०÷१० हजार नगदनापं ट्रफी, दसिपौ व ट्रेनिङ प्याकेज सिरपाः बिउगु खःसा उत्कृष्ट १० म्हेसित नं टे«निङ प्याकेज लःल्हाःगु खः । म्येँपाखे पट्कोया बबिन राजोपाध्याय, चल्खुया सिम्रन शाक्य, न्याखाचुकया शैलेश बज्राचार्य, बुबहाःया राजेश बज्राचार्य, नकबहीया जेनिश ज्योति शाक्य, गाःबहाःया सुनिल बज्र्राचार्य व झतापोल अमिर शाक्य व हुलाप्याखंपाखे कुमारीपाटीया श्रेशा श्रेष्ठ, धौगःया विभूषणा बज्राचार्य, न्याखाचुकया उत्पला बज्राचार्य, धपगाःया श्रृया बज्राचार्य, बुबहाःया नैरात्मा बज्राचार्य, न्याखाचुकया सुयंका बज्राचार्य व कायगुननिया लक्की महर्जन उत्कृष्ट झिम्हय् लाःगु खः ।
वडाया मचा कलाकारपिंत हःपा बीकथं कासाय् दुथ्याःपिं १२ दँ क्वय्यापिं कासामिपिंत “भिंतुना सिरपा” लःल्हाःगु खः । थुगु सिरपा म्येपाखे ९ दँ दुम्ह बुबहालया रिभनमुनि बज्राचार्य व कुलिम्हया १० दँ दुम्ह सजेना महर्जनं त्याकलसा हुलाप्याखनय् बुबहाःया १२ दँया निष्ठा बज्राचार्य, महापाःया १० दँया श्रीजु श्रेष्ठ व न्याधःया ८ दँ दुम्ह स्मृति शाक्यं त्याकूगु खःः ।
कासाय् दकलय् अप्वः स्वकुमिपिंसं स्वःगु भिडियोया सिरपा “टप भ्यूज” या सिरपा म्यँेपाखे चल्खुया सिम्रन शाक्यं त्याकलसा हुलाप्याखंपाखे दौबहाःया श्रीजु शाक्यं त्याकल ।
ज्याझ्वलय् संगीत प्रवीण मोहनप्रसाद जोशीयात “ललितरत्न”या उपाधिपाखें हंगु खः । थःगु नुगःखँ तयादिसें जोशीं संगीतया विकास व विस्तारय् योगदान यानादीपिंत हनेगु, थुगु पुस्तायात कला न्ह्यब्वयेत दबू बीगु व न्हूपिं कलाकारपिं मालेगु थें जाःगु थुगु ज्या अतिकं च्वछाय्बहःजू धयादिल ।
ज्याझ्वःया मूपाहां यल महानगरपालिकाया मेयर चिरिबाबु महर्जनं कलाकारपिनिगु निंतिं यल महानगरपालिका १६ वडां याःगु थुगु ज्या महानगरं अझ तब्याः यानाः यंकेगु खँ कनादिल ।
ग्वसाः खलः ललितपुर महानगरपालिका वडा १६ या अध्यक्ष निर्मलरत्न शाक्यं ‘पुलांगु ऐतिहासिक कला, सम्पदाया संरक्षण गुलि महत्वं जाः, उलि हे महत्व थुगु पुस्ताया कलाकारतय्गु विकास व वय्कःपिंत बीमाःगु प्रोत्साहन नं खः । कन्हय् झी सकसिगु गौरव तायेकीपिं कलाकारतय्गु निंतिं थौं हे झीगु लँ कीमा’ धयादिसें थःम्हं फुगु यायेगु नितिं थः न्ह्याबलें अग्रसर जुयाच्वने धयादिल । कलाकार समितिपाखें थज्याःगु ग्वसाः जुयाच्वनीगु खँ नं वय्कलं तयादिल ।
यलया दरवार क्षेत्रया ऐतिहासिक व सांस्कृतिक महत्वं जाःगु कात्ति दबुली जूगु थुगु ज्याझ्वलय् लोकं ययेकूपिं कलाकारपिं सुरजवीर, भूपेन्द्र बज्राचार्य, नील शाक्य, मोहिद्दिन खान, अमोघवीर बज्राचार्य, अमर चित्रकारं म्ये न्यंकादीगु खःसा कोरियोग्राफर निसिला शाक्यं हुलाप्याखं न्ह्यब्वयादिल । १६ वडाया संचार ख्यःया ब्यक्तित्वपिं अनुप शाक्य, मञ्जु बज्राचार्य, सलोना बज्राचार्य, प्रलिशा शाक्य, सुरजवीर, अमोघवीरं ज्याझ्वः न्ह्याकूगु खः ।
झी कवि दुर्गालाल श्रेष्ठं च्वयादीगु व जनसंगीत श्रष्टा अमरराज शर्मां लसय् चिनाः रलेन व यादवनाप हालादीगु न्हूदँया परम्परा व भिंतुनाया भाव दुथ्याःगु “न्हूदँ म्हिगःथें थौं नं वयाच्वन” म्येँ वडा समिति, कलाकार समिति, सल्लाहकारपिं, कासामिपिं सकलें जानाः हालाः न्हूदँया भिंतुना देछाःसें थुगु ज्याझ्वः न्ह्याःगु खः । ज्याझ्वःया लिपांगु ब्वय् म्येँ व हुलाप्याखं कासाय् न्हाप, ल्यू व लियांल्यू लाःपिंसं कासाय् ब्वति काःगु म्येँ व हुलाप्याखं न्ह्यब्वःगु खः ।
LEAVE YOUR COMMENTS