करिब ५० करोड मस्त दूर शिक्षापाखें वञ्चित : राष्ट्र संघ

एजेन्सी – कोरोना भाइरसया महामारीया कारणं ब्वनेकुथीत बन्द जुयाच्वंगुलिं हलिंन्यंकया करिव ५० करोड मस्तय् शिक्षाय् लिच्वः लाःगु दु ।

युनिसेफं बिहीवाः सार्वजनिक याःगु छगू रिपोर्टय् हलिंन्यंकया मस्त मध्ये ४६ करोड ३० लख मस्त दूर शिक्षापाखें वञ्चित जुयाच्वंगु खँ धाःगु दु । मस्तनाप आवश्यक साधन व विद्युतिय प्रविधिया अभावय् थज्याःगु समस्या वयाच्वंगु खँ रिपोर्टय् न्ह्यथनातःगु दु ।

‘थुलिमच्छि मस्तय् शिक्षाय् लांला तक छक्वलं प्रभाव लाकूगु धाइगु विश्वन्यंक शिक्षाया संकटकालया अवस्था खः ।’ युनिसेफया प्रबन्ध निद्रेशक हेनरिता फोरें धयादी, ‘थुकीया लिच्वः ताः ई तक समाज व अर्थतन्त्रय् खनेदयेफु ।’

महामारीया कारणं आपालं शैक्षिक संस्थातय्सं थःगु ब्वंकेगु माध्यम अनलाइन यानायंकूगु दु । तर सम्बन्धित निकायया अधिकारीतय्सं थुकीं गरीब व धनी मस्तय् दथुइ विभाजनया अवस्था वःगु खँ धासें चिउताः प्वंकूगु दु । गथेकी दूर शिक्षां युरोपय् अपायेसकं समस्या मजूसां अफ्रिका व एशियाली देय्या आपालं मस्तं प्रभावित जुयाच्वंगु दु ।

कोरोना भाइरसया महामारीया कारणं इतिहासय् हे दकलय् बांमलाक शिक्षाय् लिच्वः लाकूगु दु । संयुक्त राष्ट्रसंघया कथं जुलाइ महिनाय् जक १६० देय्या ब्वनेकुथीत बन्द जुयाः १ अर्ब स्वयां अप्व मस्तय्त लिच्वः लाकूगु खः ।

सेभ द चिल्ड्रेनं जुलाई महिनाय् पिथंगु छगू रिपोर्ट कथं १ करोड मस्त आः गवलें नं ब्वनेकुथी लिहांमवनीगु अवस्था वःगु खँ न्ह्यथंगु दु । महामारीया कारणं ब्वलनीगु गरिबी व शिक्षा क्षेत्रय् म्हो जुइगु बजेटया कारणं थज्याःगु अवस्था वइगुु अनुमान सेभ द चिल्ड्रेनं याःगु दु ।