१२१ म्ह बाजं गुरुपिंत हंसें महानगर दिवस न्यायेकल

येँ – २४ क्वःगु महानगर दिवस म्हिगः थनया बसन्तपुली छगू ज्याझ्वः यासें न्यायेकल । उगु इलय् उपप्रधान लिसें रक्षामन्त्री ईश्वर पोखरेलं येँया थीथी त्वालय् च्वंपिं थीथी जातिया १२१ म्ह बाजं गुरुपिं २५ द्वः तका सहित हनेज्या यानादिल । उगु हे ज्याझ्वलय् येँ व महानगर बारे च्वइपिं झिम्ह पत्रकारतय्त नं ५० द्वः तकाया महानगर सुशासन सिरपाः बीगु ज्या जुल ।

उकी नेवाः सञ्चार ख्यःपाखें नेवाः एफएम (संस्था) लगायत सिल्भिया राजोपाध्याय (उज्यालो एफएम) व सुगतरत्न सिन्दुराकार (सम्यक वाःपौ) यात सिरपाः बिउगु खः । उकथं हे ज्याझ्वलय् येँ नगरया न्हापांम्ह मेयर (सभापति) जनकमान श्रेष्ठयात छगूत्या लाख तका सहित सम्मान याःगु खःसा दकलय् अप्वः कर पूपिं करदातापिंत नं हनेज्या याःगु खः ।

येँ महानगरपालिकाया मेयर विद्यासुन्दर शाक्यया सभापतित्वय् जूगु उगु ज्याझ्वलय् संसदीय व्यवस्था मन्त्री लालबाबु पण्डित, संस्कृति मन्त्री रविन्द्र अधिकारी लिसें उपमेयर हरिप्रभा खड्गी श्रेष्ठपिंसं नं सम्बोधन यानादीगु खः । महानगर दिवसया लसताय् म्हिगःनिसें येँया थीथी त्वालय् स्वन्हु तक महानगर महोत्सव नं जुयाच्वंगु दु । थुकी नेवाः ज्वलं, नेवाः नसात्वँसा ब्वज्या जुयाच्वंगु दु ।

सम्बन्धित बुखँ

LEAVE YOUR COMMENTS