नेपाल चलचित्र तथा सांस्कृतिक प्रतिष्ठानया साधारणसभा

येँ – नेपाल चलचित्र तथा सांस्कृतिक प्रतिष्ठानया वंगु शनिवाः जूगु साधारणसभां प्रतिष्ठानया न्हूगु ज्यासना पुचः ल्यःगु दु । केपी पाठकया अध्यक्षताय् नीस्वंगु न्हय्म्हेसिया न्हूगु ज्यासना पुचलय् विजयरत्न तुलाधर असंबरे उपाध्यक्ष, राजु केसी महासचिव, राजु भण्डारी सचिव, कमलप्रसाद शर्मा कोषाध्यक्ष व दुजलय् विश्वराज सापकोटो व रसिक पाठकयात सर्वसम्मतिं ल्यःगु खः ।

साधारणसभाया न्हापांगु सत्रय् प्रतिष्ठानया तदर्थ समितिया अध्यक्ष केपी पाठकं प्रतिष्ठानया थीथी पक्षयात कयाः थःगु नुगःखँ तयादीगु खः । अथे हे तदर्थ समिति सचिव राजु भण्डारीं वार्षिक प्रतिवेदन व कोषाध्यक्ष कमलप्रसाद शर्मा आर्थिक प्रतिवेदन न्ह्यब्वयादीगु खः ।
थ्व हे झ्वलय् प्रतिष्ठानं थ्व हे वइगु फागुनय् निक्वःगु संस्करणया नेपाल अन्तर्राष्ट्रिय चलचित्र महोत्सवया ग्वसाः ग्वइगु जूगु दु ।

महोत्सवया निंतिं प्रतिष्ठानया उपाध्यक्ष असंबरेया संयोजकत्वय् छगू छनौट समिति नं गठन याःगु दु । उगु समितिइ वरिष्ठ सूचना प्रविधि विज्ञ करुण थापा, ध्वनिविद् आलोक तिवारी, चलचित्र निर्देशक रामराजा दाहाल, छाँयाकार शबनम मुखिया, साहित्य समालोचक अभय श्रेष्ठ व सिने पत्रकार सुशील पौडेल दुजःकथं च्वनादीगु दु ।