जापान कोलम्बियालिसे बदला कायेत ताःलात
येँ – जारी विश्वकपया न्हापांगु कासाय् कोलम्बियायात २–१ गोलं बुकुसें जापान वंगु विश्वकपय् फयेमाःगु पराजयया बदला कायेत ताःलाःगु दु । सन् २०१४ य् कोलम्बियां जापानयात ४–१ गोलं बुकूगु खः ।
जापानया निंतिं थौं कासाया खुगूगु मिनेटय् हे सिन्जी काग्वां पेनाल्टिपाखें गोल याःगु खः । थ्वयां न्ह्यव कासा सुरु जूगु स्वंगूगु मिनेटय् हे कोलम्बियाया कासामि झिम्हय् सीमित जूगु खः । काग्वायात हे बांमलाक ट्याकल याःगुलिं कार्लोस सान्चेजयात कासाया स्वंगूगु मिनेटय् हे रेड कार्ड नकाः मैदानं पिने छ्वःगु खः । सान्चेजयात क्यंगु रेडकार्ड थुगु विश्वकपया हे दकलय् न्हापांगु रेडकार्ड खःसा विश्वकप इतिहासय् दकलय् याकनं क्यंगु रेडकार्डया कीर्तिमानय् निगूगु थाय् लाःगु दु । सान्चेजयात कासा सुरु जूगु २ मिनेट ५६ सेकेन्डय् रेड कार्ड क्यंगु खः ।
कासाया ३७ औं मिनेटय् जुआँ क्वेन्टेरों चलाखीपूर्ण फ्रिकिक पाखें गोल यासें कासा बराबरीइ हःगु खः । फ्रिककया थ्वायेत्यंबलय् पःखाः कथं दनाच्वंपिं विपक्षी कासामि तिंन्हुगु इलय् क्वेन्टेरों क्वं बल थ्वानाः गोल याःगु खः । थ्व बलयात जापानी गोलकिपरं ज्वंगु ला खः, तर गोललाइन दुने ज्वंगु कारणं गोललाइन प्रविधि पाखें कोलम्बियायात गोल बिउगु खः ।
झिम्हय् सीमिति कोलम्बियाया लिसे बाघौया बराबरी लिपा कासाया ७३ औं मिनेटय् युआ ओसाकों विजयी गोल याःगु खः । केइसुके होन्डाया कर्नर प्रहारय् हेड यासें ओसाकों जापानया निंतिं विजयी गोल याःगु खः ।
LEAVE YOUR COMMENTS