हयात होटलया जग्गा लित फ्वँसें धर्ना

येँ (नेपालभाषा टाइम्स)- हयात होटलं कःघाना तःगु १५० रोपनी जग्गा स्थानीय भूमिपुत्र जनतायात हे लित बीगु माग यासें म्हिगः युवा अभियन्तातय्सं बौद्धया हयात होटल पिने धर्ना बीगु ज्या यात । स्थानीय आदिवासी नेवाःतय्गु भूमि कब्जा यानाः उगु होटल चायेकूगु खः धासें ‘यो· इण्डिजेनिष्ट लीग (वाईआईएल)’ नांगु संस्थापाखें उगु धर्ना बिउगु खः ।

धर्ना ज्याझ्वलय् सम्बोधन यासें ल्याय्म्ह अभियन्ता रविन्द्र कुमार श्रेष्ठं होटलपाखें कब्जा यानातःगु स्थानीय जनताया भूमि स्थानीय जनतायात हे लित मबिउतले थःपिनि संघर्ष जारी जुइगु खँ कनादिल । ज्याझ्वलय् नेवाः लिसें उगु लागाय् च्वंपिं तामाङ अभियन्तातय्सं नं ब्वति काःगु खः ।

अभियन्ता श्रेष्ठं थःपिनि संस्थाया नां ‘वाईआईएल’ खः, ‘वाईसीएल’ मखु धासें नां ज्वःलाः थें च्वंसां थ्व वाईसीएल व वलिसे स्वाःगु राजनीतिक संगठनलिसे थःपिनि छुं नं सम्बन्ध मदु धकाः नं स्पष्ट यानादिल ।

पञ्चायतकालय् तारागाउँ विकास समितिया नामं अधिकरण यानाः कयातःगु जग्गाय् लिपा होटल दयेकाः सञ्चालन याके बिउगु खः । थ्व जग्गा व थनया सम्पत्ति न्हापांनिसें विवादया विषय जुया वयाच्वंगु खः ।