ने. सं. ११४३ सिल्लाथ्व सप्तमी -

सरस्वती प्रधानं बिल रुपा सुनार विरुद्ध उजुरी

येँ – दलित मिसायात जातीय विभेद तयाः क्वथा बालं मबिउ धइगु द्वपनय् प्रहरी हिरासतय् लाःम्ह बबरमहलया मय्जु सरस्वती प्रधानं थौं थःत प्रहरी हिरासतय् लाकूम्ह रुपा सुनार विरुद्ध मानव अधिकार आयोगय् उजुरी दर्ता यानादीगु दु । म्हिगः वय्कःया पक्षय् वहस याना च्वनादीपिं नेवाः कार्यकर्ता लिसें थः जहाननाप मानव अधिकार आयोगया ज्याकुथी वनाः वय्कलं उगु उजुरी दर्ता यानादीगु खः ।

थःगु उजुरी भ्वँतय् वय्कलं रुपा सुनारं लकडाउनया इलय् नं निषेधाज्ञाया उल्लंघन यासें क्वथा मालेगु त्वहः चिनाः थःगु छेँय् वःगु व थःगु स्वीकृति मदयेक हे थःलिसे जूगु टेलिफोन संवाद रेकर्ड यानाः नियोजित रुपं हे फँसे यायेत स्वःगु द्वपं बियादीगु दु । फोन रेकर्ड यानाः थःत फँसे यायेगु लिसें प्रहरी हिरासतय् तयेगु ज्या याःगु कारणं थुकिं यानाः थःगु मानव अधिकार हनन् जूगु दु धासें वय्कलं रुपा सुनारयात कारवाही यायेमाःगु माग नं यानादीगु दु ।

वय्कलं रुपा सुनारयात थम्हं छुं नं कथंया छुवाछूत व विभेदकारी व्यवहार मयानागु जिकिर यासें थःत फँसे यायेत नियोजित ज्या याःगु कारणं सुनारयात हे कारवाही यायेमाःगु माग यानादीगु खः ।

वय्कलं रुपायात क्वथा मालेत ग्वाहालि याःपिं सुष्मा राई व सिर्जना राईयात नं कारवाही यायेमाःगु माग यानादीगु दु ।

लिसें वय्कलं थः च्वंच्वनागु छेँ थःगु मखुसें थः माजु व जहानयागु खः धासें थःत अनावश्यक रुपं छेँथुवाः धकाः प्रस्तुत यायेत स्वःगु खँ नं उजुरीइ धयातःगु दु । उगु छेँय् सुयातं बालं तयेगु वा मतयेगु धइगु खँ थःगु अधिकार क्षेत्र दुने मलाःगु खँ नं वय्कलं स्पष्ट यानादीगु दु ।

रुपा सुनारं थःगु व्यक्तिगत जीवनया स्वतन्त्रता हनन् यायेगु कुतः याःगु धासें थःगु विरुद्ध गैरकानुनी रुपं उजुरी तयाः थःगु प्रहरी हिरासतय् तयेगु ज्या याःगु खः धकाः नं द्वपं बियादीगु दु ।

स्वनिगःया थीथी थासय् सरस्वती प्रधानयात न्याय बी नु धकाः च्वयातःगु ब्यानर सहित थौंकन्हय् हस्ताक्षर मुनेगु ज्या नं जुयाच्वंगु दु । उकी आपालं मनूतय्सं हस्ताक्षर नं यानाच्वंगु दु ।