सरस्वती प्रधानया उजुरी बल्ल दर्ता जुल

येँ -जातीय भेदभाव यासें छम्ह दलित मिसायात क्वथा बालं मबिउ धकाः द्वपं लाःम्ह बबरमहलया छेँथुवाः मय्जु सरस्वती प्रधानं थःत उजुरी बिउम्ह रुपा सुनार विरुद्ध तःगु उजुरी म्हिगः बल्ल दर्ता जुल । म्हिगः येँया अनाम नगरस्थित प्रहरी कार्यालयं नेवाः अभियन्तातय् प्रचण्डया दबाबया दथुइ उगु उजुरी दर्ता याःगु खः ।

रुपा सुनारं थः विरुद्ध गलत द्वपं बियाः उजुरी तःगु, थःलिसे जूगु खँल्हाबल्हा अवैध रुपं टेप याःगु, उकियात गैर कानुनी रुपं टंकन यानाः सार्वजनिक याःगु, प्रहरीं माग यातं नं थःगु मोबाइल फोन अनुसन्धानया लागिं प्रहरीयात बीत आनाकानी याःगु आदि द्वपं बिसें प्रहरीइ उगु उजरी दर्ता याःगु खः ।

अनामनगर प्रहरीं उगु उजुरी दर्ता यानाः कायेत छुं न्हि न्ह्यवंनिसें आनाकानी याना वयाच्वंगु खः । प्रहरीं उजुरी दर्ता मयाःगुलिं अभियन्तातय्सं सरकारी वकिलया ज्याकुथी उजुरी बिउगु खः । वयां लिपा सरकारी वकिलया ज्याकुथिं उजुरी दर्ता याःसां जिउ धायेवं तिनि प्रहरीं बल्ल बल्ल उजुरी दर्ता याःगु खः ।

थ्व उजुरी दर्ता लिपा नं प्रहरीं थुकियात प्रक्रियागत रुपं न्ह्यःने न्ह्याकी लाकि मन्ह्याकी धइगु खँ धाःसा निश्चित मजूनिगु खँ अभियन्तातय्सं धाःगु दु ।

थ्वहे झ्वलय् दलित अभियन्ता रुपा सुनारं शिक्षा मन्त्री कृष्ण गोपाल श्रेष्ठ व छेँथुवाः सरस्वती प्रधान विरुद्ध सर्वोच्च अदालतय् दर्ता याःगु रिटया कयाः कन्हय् २९ गते वहस शुरु जुइत्यंगु दु । प्रहरीं कन्हय्या वहस लिपा जक प्रधानया उजुरी कायेगु बिचाः याःगु खःसां अभियन्तातय्सं दबाब बियाः म्हिगः हे उजुरी दर्ता याकूगु खः । कन्हय् सर्वोच्चय् जुइगु वहसय् मन्त्री श्रेष्ठ लिसें छेँथुवाः प्रधानया पक्षं नं कानून व्यवसायीतय्सं ब्वति काइगु खँ दु ।

प्रधानयात शुरुइ उजुरी बिउम्ह सुनारं छानबिनया लागिं प्रहरीयात थःगु मोबाइल आः तक नं बिउगु मदुनि