हनुमानध्वाखाया प्रहरी ज्याकू थुनेत अझं आलताल

येँ (नेपालभाषा टाइम्स)÷थनया हनुमानध्वाखाय् अथें लानाच्वंगु जिल्ला प्रहरी कार्यालय येँया पुलांगु भवन आः तक छाय् मथुंगु थें ? थ्व भवन आः तक थुने मफयाच्वंगु प्रकरणं नेपाःया गञ्जागोल प्रशासनया किपा ब्वयाच्वंगु दु । थ्व भवन याकनं थुना छ्वये माल धकाः अभियान हे न्ह्याका च्वनादीम्ह सम्पदा अभियन्ता यादवलाल कायस्थया कथं भ्वाथः जुयाः जर्जर जुइधुंकूगु थ्व भवन थुना छ्वयेगु जुल धकाः गृह मन्त्री नारायणकाजी श्रेष्ठ, संस्कृति मन्त्री सुदन किराती, येँ महानगरपालिकाया मेयर बालेन साह, नेपाल प्रहरीया आईजीपी बसन्त कुँवर, पुरातत्व विभागया महानिर्देशक शौभाग्य प्रधानाङ्ग लगायत थ्वलिसे सरोकार दुगु फुक्क हे निकायया पदाधिकारीतय्सं स्पष्ट रुपं धयादीधुंकल । तर नं भवन थुने धाःसा फयाच्वंगु मदु ।

कायस्थया कथं भवन थुनेगु लागिं पुरातत्व विभागं संस्कृति मन्त्रालययात व संस्कृति मन्त्रालयं गृह मन्त्रालययात पौ छ्वयेगु ज्या यायेधुंकल । तर संस्कृतिया पौ गृह तक मथ्यंगु जुयाः थुनेगु ज्या न्ह्याये फयाच्वंगु मदुनि ।

थ्वया दथुइ नेपाल प्रहरीं थ्व थाय्या लालपूर्जा हे थःपिंके दु धकाः दावी याःगु खँ नं पिहां वःगु दु । तर कायस्थं थज्याःगु सम्पदास्थलया लालपूर्जा हे दुसां व कायम जुइ मखु धासें यदि प्रहरीयाके धाथें लालपूर्जा दुसा व लालपूर्जा बिउम्ह हाकीमयात समेत कारवाही जुइगु ख्याच्वः बियादिल ।

नेपाल प्रहरीया ज्याकू दुगु थ्व भवन थुनाः अन खुल्ला यायेगु वा सांस्कृतिक केन्द्र दयेकेगु धकाः केशव स्थापित मेयर जुयाच्वंगु इलय् तत्कालिन येँ महानगरपालिकां योजना हःगु खः । तर अबले थ्व भवन थुने मफुत । वयां लिपा विद्यासुन्दर शाक्य मेयर जुयाच्वंगु इलय् थ्व भवन थुनाः अन न्हूगु कथंया संरचना दयेकेगु धकाः गुरुयोजना हे तयार यायेधुंकूगु खः । अथे हे उगु लागाया प्रदेश सांसद राजेश शाक्यं नं प्रहरी ज्याकू थुनाः खुल्ला यायेगु धकाः योजना तयार याःगु खः । तर नं भवन धाःसा थुने मफुनि ।

आः अभियन्ता कायस्थ व वय्कःया पुचलं थ्व भवन थुना छ्वयेगु लागिं हानं न्हूकथं अभियान न्ह्याकादीगु खः । थ्व भवन थुनेगु स्वीकृति वल धाःसा थुकियात सुं सरकारी निकाययात थीके मबिसे स्थानीय जनता थःपिं हे जानाः थुना छ्वयेमाःगु खँ नं वय्कलं धयादीगु दु ।