बौद्धविद्वान प्रजापतिया हना

ख्वप (नेपालभाषा टाइम्स)- नगदेश बुद्ध बिहारय् मध्यपुर थिमिइ नेपाल राष्ट्रिय ज्ञानमाला समिति अन्तर्गत भक्तपुर जिल्ला क्षेत्रिय उपसमितिया खुक्वःगु पलिस्था न्हि हनेगु लिसें बौद्ध विद्वान कृष्णकुमार प्रजापतिया हनेज्या जूगु दु ।

भक्तपुर जिल्ला क्षेत्रिय उपसमितिया संयोजक गणेशराम प्रजापतिया सभापतित्वय् आइतवाः जुगु ज्याझ्वलय् श्रद्धेय अनागारिका गौतमी गुरूमानं पञ्चशील प्रदान यानाबिज्याःगु खः । मू पाहाँ नेपाल राष्ट्रिय ज्ञानमाला समितिया अध्यक्ष एवं वरिष्ठ गायिका रमना श्रेष्ठं सुकुन्दाय् मत च्याकाः ज्याझ्वः उलेज्या यानादिसें बौद्धविद्वान कृष्णकुमार प्रजापतियात दोसल्ला न्ययेका ताम्रपत्र लःल्हानाः हनादिल । ज्याझ्वलय् वय्कलं भाजु प्रजापतिया योगदान व ज्ञानमाला भजन विषयय् न्वनादिसें ज्ञानमाला भजन याइपिं व मयाइपिं दथुइ फरक दयेमाःगु कनादिल । विशेष पाहाँ केन्द्रीय महासचिव इन्द्रमुनि शाक्यं ज्ञानमाला भजन याःथें व्यवहारय् नं छ्यलेमाःगु कनादिल ।भक्तपुर जिल्ला क्षेत्रीय उपसमितिया सचिव तुलसीकाजी मानन्धरं दछिया प्रतिवेदन न्ह्यब्वयादीगु ज्याझ्वलय् कोषाध्यक्ष कृष्णभक्त हाँय्जुं आर्थिक प्रतिवेदन न्ह्यब्वयादीगु खः ।

अथेहे नेपाल राष्ट्रिय ज्ञानमाला समितिया सल्लाहकार डा. पुष्परत्न शाक्य, मध्यमाञ्चल उपाध्यक्ष पुण्यरत्न शाक्यपिंसं ज्ञानमाला भजनया शुरुआत व आःया ई यक्व फरक जुइधुंकूगु खँ कनादिल । ज्याझ्वलय् बौद्धविद्वान प्रजापतिं बुद्धधर्मय् लगय् जुयागुया अनुभव कनादीगु खः ।

सभापति गणेशराम प्रजापतिं सम्मानित व्यक्तित्व प्रजापतिया बचाःहाकःगु जीवनी कलादिल । ज्याझ्वय् उपसमितिया सहसंयोजक गौतम बज्राचार्यं लसकुस न्वचु तयादिलसा सुभाय् न्वचु रत्नभक्त हाँय्जुं बियादिल ।

ज्याझ्वः शुरू जुइ न्ह्यः निघौति ज्ञानमाला भजन याःगु खः । ज्याझ्वः पञ्चशील प्रार्थनापाखें न्ह्याकाः पुण्यानुमोदन यानाः क्वचायेकूगु खः ।