सिलु तीर्थय् झिद्वलं मल्याक भक्तजन

येँ(नेपालभाषा टाइम्स)- गुंपुन्हिया झ्वलय् तःजिगु मेला लगे जुइगु सिलु तीर्थय् थुगुसी झिद्वलं मल्याक भक्तजन थ्यंगु दु । गुपुन्हिकुन्हु विशेष मेला जुइगु सिलुइ म्वःल्हुइत व पुजा यायेत आपालं थासं भक्तजन वनेगु याइ ।

गुंपुन्हिया इलय् जुइगु सिलु तीर्थया मेलाय् सहभागित जुइत रसुवावासीलिसें येँ, यल, ख्वप, काभ्रेपलाञ्चोक, सिन्धुपाल्चोक, धादिङ, नुवाकोट, कास्की, पर्वत, लमजुङ, तनहुँ, रौतहट, मकवानपुर, द्वाल्खा, ओखलढुंगा, बारा, पर्सा, रामेछाप लगायतया आपालं जिल्लां भक्तजनत सिलु तीर्थ वंगु खः । सिलु तीर्थय् म्वःल्हुइगु व पुजाया निंतिं मिसा, मस्त, ज्याथजिथिपिं तकं समुद्री सतहं ४,३८० मिटर तवाःगु थासय् च्वंगु तीर्थय् थ्यंकः वंगु खँ सीदुगु दु ।

सिलुइ वइपिंत स्वास्थ्यय् समस्या मजुइमा धकाः उपचार व छुं नं घटना जूगु तत्काल उद्धारया निंतिं नेपाली सेना नापं हिमालय उद्धार संघपाखें आवश्यक व्यवस्था यानातःगु दु । सिलु तीर्थय् म्वःल्हुइगु इलय् जुइ फुगु जोखिमयात ध्यानय् तयाः रसुवाया श्यामेवाङफेल विद्यालयया २६ म्ह रेडक्रसकर्मितकं परिचालन यानातःगु दु ।