मेलम्ची सुरुङया ज्या अन्तिम चरणय्
येँ – बहुप्रतिक्षित व चर्चित मेलम्चीया लः स्वनिगलय् हयेगु निंतिं अन्तिम चरणया ज्या ल्यं दनिगु सीदुगु दु । मेलम्ची खानेपानी आयोजनाया सुरुङया अन्तिम चरणया ज्या अझं ७ दशमलव ३ किलोमीटर ल्यं दनि । सुरुङ दुनेया धलान यायेु ज्या नं २९ प्रतिशत ल्यं दनि ।
सिन्धु, ग्याल्थुम व अम्बाथानसहतिया स्वंगू पहुँचमार्ग लिक्क थ्यनाच्वंगुलिं न्हिथंया ज्याय् तीव्रता बिया वन धाःसा वइगु छुं दिंया दुने ज्या सिधइगु मेलम्ची खानेपानी विकास समितिया सूचना अधिकारी वरिष्ठ इन्जिनियर राजेन्द्रप्रसाद पन्तं कनादिल । थौंकन्हय् सुरुङ दुने न्हिं २०० निसें करिब ३०० मिटर धलान यायेगु ज्या जुयाच्वंगु दु ।
पन्तया कथं थ्व ल्याखं तीव्र गति ज्या न्ह्याः वनाच्वन धाःसा सकतां ज्या सिधयेत लछि स्वयां म्हो अवधिया दुने ज्या क्वचाये फइगु लक्ष्य कयातःगु दु । ठेकेदार कम्पनीया आन्तरिक कमजोरीया कारणं ढिलासुस्ती जुयाच्वंगु आयोजनाया ज्याय् आः समस्या समाधान जुइवं न्हिं २५० मिटर धलान यायेत ठेकेदार कम्पनी सहमत जूगु दु ।
मोहनिया इलय् धलान यायेगु ज्या दिउगु व स्वन्तिया इलय् नं दिकेमालीगु अवस्था वयेवं धलान सम्पन्न यायेगु ज्या करिब लछि ति लिज्याः वनीगु सम्भावना खने दयाच्वंगु दु । सिन्धुपाल्चोकया हेलम्बुया अम्बाथाननिसें सुन्दरीजल तकया करिब २७ दशमलव ५ किलोमीटर सुरुङ म्हुइगु ज्या वंगु चैत २७ गते हे क्वचायेधुंकूगु खः ।
सुरुङ म्हुइगु ज्या क्वचाःगु निन्हुलिपा चैत २९ गते उपराष्ट्रपति व खानेपानी तथा सही विकासमन्त्रीं आयोजनाया मुहानस्थलय् जूगु औपचारिक ज्याझ्वलय् सुरुङ निर्माण सम्पन्न जूगु घोषणा यानादीगु खः । नेपाल सरकार व इटालीया ठेकेदार कम्पनी दथुइ सन् २०१३ य् हे सुरुङ मार्ग निर्माण सम्पन्न यायेगु सम्झौता जूगु खःसां निर्धारित ईया दुने ज्या जुइमफयेवं तःक्वः तःक्वः म्याद थप याःगु खः ।
LEAVE YOUR COMMENTS