इटालीया प्रशिक्षकय् ग्वार्डिओलाया चर्चा
एजेन्सी – युरोपेली देय् इटालीया न्हूम्ह प्रशिक्षकया रुपय् पेप ग्वार्डिओलाया नां चर्चाय् वयाच्वंगु दु । प्यक्वः तकया विश्वकप उपाधि विजेता इटाली थुगुसी नापं प्यक्वः हे विश्वकपय् छनोट जुइत असफल जूगु खः ।
सन् २००६ लय् दकलय् लिपा विश्वकप उपाधि त्याकूगु इटाली सन् २०१८ निसें लगातार स्वक्वःतक विश्वकपया लिपांगु चरणय् छनोट जुइत असफल जुयाच्वंगु दु । थ्व स्वयां न्ह्यः सन् १९५८ य् नं इटाली फाइनल चरणय् छनोट जुइत असफल जूगु खः।
विश्वकपय् लगातार धइथें छनोट जुइत असफल जुइवं व्यावसायिक ख्यलय् विश्व फुटबलया छम्ह सफल प्रशिक्षक ग्वार्डिओला आः इटालियन टोलीया न्हूम्ह प्रशिक्षक जुइगु चर्चा जुयाच्वंगु दु । इटालियन संचारमाध्यमया कथं इटालियन फुटबल महासंघ व ग्वार्डिओलाय दथुइ प्रारम्भिक चरणया सहलह जुइधुंकूगु दु ।
इटालियन फुटबल महासंघ (एफआईजीसी)या प्राविधिक निर्देशक लिसें इटालीया महान् फुटबल कासामि पाउलो माल्दिनी व वया सल्लाहकार लियोनार्दो बार्सिलोना वनाः पेप ग्वार्डिओलालिसे स्वन्हुतक सहलह याःगु खः ।
यदि थ्व सहलह सकारात्मक जुल धाःसा सन् १९६०या दशक लिपा इटालीया राष्ट्रिय टोलीया प्रशिक्षक जुइम्ह ग्वार्डिओला न्हापांम्ह गैर इटालीयन जुइ । इटालियन राष्ट्रिय टोलीया मुख्य प्रशिक्षकया रुपय् रोबर्टो मान्चिनी व आन्द्रेइ पिर्लोया नां नं दावेदारकथं चर्चाय् वःगु खः ।
व्यावसायिक फुटबलया ख्यलय् इंग्लिश क्लब म्यानचेष्टर सिटीया प्रशिक्षक जुयाच्वंम्ह ग्वार्डिओलां वंगु मई महिनाय् जक थःगु झिदँया यात्रा क्वचायेकूगु खः । क्लबय् आवद्ध जुयाच्वंगु वंगु १० दँया अवधि दुने ग्वार्डिओलाया प्रशिक्षणय् म्यानचेष्टर सिटीं प्रिमियर लिग, एफए कप, कम्यनुटिी शिल्ड, च्याम्पियन्स लिग, युर्ईएफए सुपर कप, फिफा क्लब विश्वकप यानाः २० गू स्वयां अप्वः उपाधि त्याकेत ताःलाःगु खः ।
LEAVE YOUR COMMENTS