ईयू ज्याकुथी जनजाति पार्टी

येँ -पहिचानय् आधारित संघीय गठबन्धनपाखें नेपाःस्थित युरोपियन युनियनया राजदूत बेरोनिका कोडीयात नापलानाः नेपाःया आदिवासी जनजातिया मुद्दायात राज्यसत्तां अझ नं सम्बोधन याना मच्वंगु खँय् सहलह ब्याकल ।

युरोपियन युनियनं छुं ई न्ह्यः तिनि नेपालय् जूगु निर्वाचन सम्बन्धी सर्वेक्षण रिपोर्ट जारी यासें समानुपातिक निर्वाचन प्रणालीइ खस आर्य क्लस्टरयात नं दुथ्याकातःगु पाय्छि मजू धइगु बिचाः बिउगु खः । युनियनया उगु रिपोर्टयात नेपाः सरकार व खस आर्य समुदायं कडा विरोध याःगु खःसां पहिचानवादी पार्टीतय्सं धाःसा समर्थन याःगु खः ।

वय्कःयात नापलायेत नेपाः राष्ट्रिय पार्टीया नायः डा. विजय सैंजु, खम्बुवान राष्ट्रिय पार्टीया आरके खम्बु, लिम्बुवान पार्टीया कुमार लिङ्देल, आदिवासी जनजाति पार्टीया बुद्धराज तामाङ, खसान संघर्ष समितिया प्रेमबहादुर खातीपिं झाःगु खः ।