गगन थापां यात प्रधानमन्त्री पदया दावी

येँ (नेपालभाषा टाइम्स)-नेपाली कांग्रेसपाखें येँया ४ नम्बर क्षेत्रया प्रतिनिधिसभाय् त्याःम्ह गगन थापां आःया चुनाव लिपा देशय् न्हूगु सरकार जक मखु न्हूम्ह चालक सहितया सरकार वयेमा धकाः जनतां आशा यानाच्वंगु खँ कनादीगु दु । निर्वाचित जुइवं थःगु प्रतिक्रिया बीगु झ्वलय् थापां उगु खँ धयादीगु खः ।

चुनाव न्ह्यः हे थःत भावी प्रधानमन्त्रीया कथं न्ह्यब्वयेगु याना वयाच्वनादीम्ह नेता थापां चुनाव क्वचायेवं पार्टीया संसदीय दलया नेता जुइगु तयारीपाखे वनेगु खँ नं धयादीगु दु । वय्कलं आः क्वचाःगु निर्वाचनय् मतदातां विश्वासया मत जक बिउगु मखुसें राजनीतिक पार्टी विरुद्ध आक्रोस नं प्वंकूगु दु धासें धयादिल, ‘निर्वाचन जुल, संवैधानिक प्रक्रिया अवरुद्ध जुइगु प्रक्रिया दित, थुकिं आम मनूत खुसी जूगु दु । तर संविधानय् प्वंकूगु बाचात अझ पूवंगु मदुनि । उकिं जनता आक्रोशित दु । थुगु चुनावं मतदाताया आकांक्षा पूवंके फइगु न्हूगु सरकार मालाच्वंगु दु ।’

उकथं हे येँया क्षेत्र नम्बर ९ लय् त्याःम्ह नेकपा एमालेया नेता कृष्णगोपाल श्रेष्ठं मतदातां बिउगु जिम्मेवारीयात न्यादँ तक कुशलतापूर्वक पूवंकेगु प्रतिबद्धता प्वंकादीगु दु । वय्कलं जनताया हरेक समस्या सम्बोधन यायेगु खँय् थः न्ह्याः वनेगु नितिं जनताया सल्लाह कायेगु खँ नं धयादीगु दु ।

उकथं श्रेष्ठं थः निर्वाचन क्षेत्रया योजना स्वाभाविक रुपं न्ह्यःने वनी धासें पूमवंगु योजनायात पूवंकेगु नितिं संघ, प्रदेश व स्थानीय सरकारलिसे परामर्श यानाः माःकथं न्हूगु योजना तर्जुमा यायेगु खँ नं धयादीगु दु ।

सम्बन्धित बुखँ

LEAVE YOUR COMMENTS