चीनय् अध्ययनया निंतिं वनीपिंत विदाइ

येँ – अरनिको समाजं चीनय् उच्च शिक्षा अध्ययनया निंतिं वनेत्यंपिं विद्यार्थीतय्त छगू ज्याझ्वःया दथुइ विदाइ नापं भिंतुना देछायेगु व सुझाव बीगु ज्या जुल । समाजया अध्यक्ष डा. सर्वोत्तम श्रेष्ठं उच्च शिक्षाया निंतिं चीन वनीपिं विद्यार्थीतय्सं नेपाःया इज्जत ज्या नं याये फयेकेमाः धासें अनया शीप, कला व प्रविधिया ज्ञान हासिल यानाः नेपालय् वयाः उकिया सदुपयोग यानाः देय्या सेवा यायेगु स्वयेमाः धयादिल ।

लिसें वय्कलं चीनया थीथी विश्वविद्यालयं थीथी विषयय् अध्ययन याइपिनिगु निंतिं छात्रृवत्तिया कोटा व्यवस्था यानातःगु नं जानकारी बियादिल ।ज्याझ्वलय् चीनय् अध्ययन यानाः वःम्ह ग्रेट ५ पास यानादीम्ह पुलांम्ह विद्यार्थी नापं पत्रकार धनञ्जय बुढां थः पत्रकारिता ब्वने चीन वनागुया अनुभव न्यंकादिसें अबलय् थःनापं च्याम्ह पत्रकारिता ब्वनेत वनागु इलय् थःपिंत विद्यार्थी स्वयां नं पत्रकारकथं चीनं अप्वः मान्यता बियाः ब्वंकूगु धयादिल ।

अथे हे मेम्ह ग्रेट ५ अध्ययन पूवंकादीम्ह पुलांम्ह विद्यार्थी आरति श्रेष्ठं नं मेहनत यानाः ब्वने फत धाःसा चीनय् सकतां ज्ञान प्राप्त याये फइ धयादिल । ज्याझ्वलय् ग्रेट ५ पूवंकादीपिं चीनय् उच्च शिक्षा हासिल यानाः वःपिं कल्पना पौडेल, रणचन्द्र श्रेष्ठ, दिलिपमान सिंह लगायतया विद्यार्थीं चीनय् थःपिंसं अध्ययन यानागु ईया अनुभव न्यकादीगु खः । समाजया कुतलय् ख्वीन्याम्ह विद्यार्थी उच्च शिक्षाया निंतिं चीन वंगु खः ।

सम्बन्धित बुखँ

LEAVE YOUR COMMENTS