येँ महानगरय् मिजंपाखें पारपाचुकेत निवेदन तइपिं अप्वल

येँ – येँ महानगरपालिकाया न्यायिक समितिइ थौंकन्हय् पारपाचुकेगु निंतिं मिजंतय्सं मुद्दा दर्ता यायेगु ज्या नं अप्वयाच्वंगु दु ।

न्यायिक समितिया संयोजक लिसें उपप्रमुख हरिप्रभा खड्गीया कथं मिसातय्त पारपाचुकेया निंतिं तप्यंक अदालतय् मुद्दा तयेगु अधिकार दु । मिजंतय्सं धाःसा न्हापा न्यायिक समितिइ निं मुद्दा तयेमाःगु व्यवस्था दुगुलिं न्यायिक समितिइ मुद्दा तइपिं मिजंतय् ल्याः अप्वया वनाच्वंगु खः ।

अन पारपाचुकेया निंतिं वइगु मुद्दात मध्ये आपालं अजूचायापुगु नं दु । छगू उजुरीइ मुक्कं बाघौ जक नाप लाःगु भरय् इहिपा जूगु व वयां छुं ई लिपा हे पारपाचुकेया लागिं निवेदन वयाच्वंगु दु । इहिपाया छुं न्हि लिपा हे मिसायात चितवनया छेँय् त्वःताः मिजं येँय् वःगु खःसा येँनं हे वं पारपाचुकेया लागिं निवेदन बिउगु खः । मिजं नाप ब्याहा यायेधुंकाः छन्हु बहनी मिसायात दुबईनं फोन वःगु व उगु हे फोनया कारणं उमि दथुइ पारपाचुकेगु तकया अवस्था वःगु खँ धाःगु दु । उगु घटना लिपा मिजं येँय् वःगु खःसा व आः वं पारपाचुकेया निंतिं येँ महानगरपालिकाय् निवेदन बिउगु खः । उगु फोन दुबईलय् च्वंम्ह मिजनं याना हःगु जुयाः भाःतम्हं शंका यानाः पार कायेत्यंगु जुयाच्वन ।

मेखे मिसां धाःसा थः चितवनय् माजु बाजु नाप च्वंच्वनेमाःगु व भाःत थःत त्वःताः येँ वयाच्वंगुलिं यानाः सम्मानपूर्वक म्वाये मखंगु धासें थः भाःत गन दु अन हे च्वने दयेमाः धकाः जिकिर यानाच्वंगु दु । थौंकन्हय् अप्वः धइथें मिजंतय्सं थः पिने वनाच्वंगु इलय् कलाः मेम्ह मिजंनाप लगे जूगु द्वपं बिसें पारपाचुकेया लागिं निवेदन बीगु ज्या अप्वयाच्वंगु दु ।

थौंकन्हय् स्वनिगःया स्थानीय नेवाःतय् दथुइ नं पारपाचुकेगु घटना अप्वयाच्वंगु दुसा उकिया लागिं नं मनपाय् निवेदन बीगु क्रम अप्वयाच्वंगु दु । विशेष यानाः मिजंतय्सं कलाःम्हं थः मांअबुयात बांलाक मस्वःगु धासें पारपाचुकेत निवेदन बीगु यानाच्वंगु दु । लिपांगु इलय् नेपालय् हिला वनाच्वंगु सामाजिक कारणं यानाः थज्याःगु समस्या ब्वलनाच्वंगु खनेदु ।

थौंकन्हय् वैदेशिक रोजगारीया कारणं यानाः नं तिपूतय् दथुइ थीथी कथंया समस्यात ब्वलनाच्वंगु दु । नकतिनि जक ब्याहा यानाः निला स्वला मदयेकं हे मिजंत कमे यायेगु निंतिं पिहां वनीगु जुयाः मिस्त छेँय् याकःचा च्वनेमाःगु व उकिं यानाः हे शंका, उपशंका जुयाः परिवार विघटनया अवस्था तक पिहां वयाच्वंगु खनेदु । न्हापा पिने पिने जिल्लाय् जक खने दइगु थ्व समस्या थौंकन्हय् स्वनिगः दुने नं व्यापक जुया वनाच्वंगु दु ।