ने. सं. ११४६ अनलाथ्व नवमी -

लुम्बिनीइ न्हूगु शहर दयेकेगु योजनाया विरोध

येँ – गौतम बुद्ध बूगु लुम्बिनी जःखः तःधंगु शहर दयेकेगु योजना सरकारं हयेवं उकियात कयाः विरोध जूगु दु । सरकारं विस्तृत परियोजना (डीपीआर) सार्वजनिक मयासे लुम्बिनीयात केन्द्रय् तयाः प्यंगू किलोमिटर क्षेत्रय् व्यवस्थित शहर दयेकेगु योजना लुम्बिनी विकास कोषं दयेकातःगु दु ।

लुम्बिनीइ सरकारं परियोजना कथं ज्या न्ह्याकेत्यंगु धासें स्थानीय वासिन्दां धाःसा विरोध याःगु दु । वंगु छुं न्हि न्ह्यः संस्कृति तथा पर्यटन तथा नागरिक उड्डयन मन्त्री योगेश भट्टराईं सरकारं न्ह्याकेत्यंगु योजनायात ग्वाहालि यायेत इनाप यानादीगु खः । तर उगु योजनायात कयाः स्थानिय वासिन्दां धाःसा असहमति क्यंगु खः ।

लुम्बिनी क्षेत्रया प्रदेश सांसद फखरुद्दीन खानं सरकारं स्थानीय वासिन्दालिसे सहलह मयासे ज्या न्ह्याकूगुलिं स्थानीय जनता असन्तुष्ट जुयाच्वंगु धासें परियोजनाया विरोध यानादीगु दु । वय्कःया कथं सरकारया कारणं हे स्थानीय जनतां विरोधय् कुहां वयाच्वंगु खः । वय्कलं न्ह्यःने धयादी, ‘लुम्बिनीयात शहर दयेकेगु योजना गुकथं वल, छाय् वल, जिपिं स्वइतं जानकारी याकूगु मदुनि ।’

वय्कलं धयादी, ‘जग्गा अधिग्रहणया खँ मनूतय् दथुइ त्रास ब्वलंगु दु, जनतायात साथ मकासे ज्या न्ह्याकल धाःसा विरोध जुइगु स्वभाविक खः ।’ सरकारं कोरियाली सहयोग नियोग कोईकालिसे शहरया गुरुयोजना दयेकेगु निंतिं २०६७ सालय् १७ करोड तकाय् सहमति याःगु खः । उगु सम्झौता कथं कोरियाली प्राध्यापक क्वाक यांगगुनं शान्ति शहरया गुरुयोजना दयेकाः सरकारयात लःल्हाये धुंकूगु दु ।

मेखे लुम्बिनी विकास कोषया सूचना सम्पर्क अधिकारी हरिध्वज राईं उगु गुरुयोजना न्ह्यःने न्ह्याकेगु वा मन्ह्याकेगु धइगु बारे कोषं निर्णय मयाःगु खँ धयादीगु दु । वय्कःया कथं न्हापांगु चरणय् सरोकारवाला फुक्कं निकाय लिसे सहलह यायेगु व उकिया हे आधारय् कार्यान्वयनया विषयसं लिच्वः पिहां वइ ।

मेखे लुम्बिनी सांस्कृतिक नगरपालिकाया प्रमुख मनमोहन चौधरीं लिपांगु योजना बांलाःगु खःसां नं स्थानीय जनताया उठीबास जुइगु अवस्था वल धाःसा कार्यान्वयनय् हाथ्या वइगु खँ धयादीगु दु ।

चौधरीं न्ह्यःने धयादी, ‘न्हापां सरोकारवालां जनतायात थुइकेमाः, उपिं राजी जुल धाःसा जक ज्या न्ह्याकेगु खः ।’
जापानी प्राध्यापक केन्जो टांगें सन् १९७८ स तयार याःगु गुरुयोजनाया कथं ज्या क्वचायेके फयाच्वंगु मदु । न्हापाया गुरुयोजना कथं ज्या जुइ मफयाच्वंगु इलय् न्हूगु योजना वःगुलिं स्थानीय जनता लिसे जनप्रतिनिधितय्सं नं विरोध यानाच्वंगु खः ।