झिंछम्ह राजदूत सिफारिसय् स्वम्ह झापाली

येँ- प्रधानमन्त्री केपी शर्मा ओलीं थीथी ११ गू देय्या लागिं राजदूत नियुक्तिया सिफारिस यानादीगु दु । वय्कलं सिफारिस यानादीपिं थ्व मनूतय्त संसदया सुनुवाई समितिं स्वीकृत यात धाःसा राष्ट्रपतिपाखें नियुक्त यानादी ।

थुकी नेपाल सरकारं अष्ट्रेलियाया लागिं नेवाः न्ह्यलुवा पद्मरत्न तुलाधरया म्ह्याय् मय्जु सुम्निमा तुलाधरयात राजदूत नियुक्तिया सिफारिस याःगु दु । मय्जु तुलाधर ताःई न्ह्यवंनिसें नेपालय् मचा अधिकारलिसे सम्बन्धित ख्यलय् ज्या याना च्वनादीम्ह खः । नेपालय् मचा अधिकारया मुद्दा ल्ह्वनेत पलिस्था जूगु न्हापांगु संस्था सीविनया वय्कः प्रमुख खः । वय्कःया अन्तर्राष्ट्रिय सम्बन्ध, वैदेशिक ज्ञान व भाषिक क्षमताया आधारय् सरकारं राजदूत पदय् सिफारिस याःगु खँ सीदुगु दु ।

सरकारं ११ म्ह राजदूत सिफारिस याःगुली स्वम्ह अर्थात ३० प्रतिशत राजदूत प्रधानमन्त्री केपी ओलीया गृहजिल्ला झापायापिं लाःगु खँय् धाःसा आलोचना जूगु दु । म्यान्मारया लागिं सिफारिस जूम्ह नारायणप्रसाद संग्रौला, बहराइनय् सिफारिस जूम्ह युवराज कार्की व डेनमार्कय् सिफारिस जूम्ह सुमित्रा भण्डारी झापायापिं खः । उकिसनं सुमित्रा भण्डारी प्रम ओलीया हे परराष्ट्र सल्लाहकार डा. राजन भट्टराईया ससःमां खः ।

अथे हे सरकारं दयेकातःगु कार्यविधिइ राजदूत नियुक्त यायेबलय् बछि परराष्ट्र सेवायापिं हे जुइमाः धयातःगु दुसां आः सिफारिस जूपिं ११ म्हय् निम्ह जक परराष्ट्र सेवायापिं लाःगु खँय् नं आलोचना जुयाच्वंगु दु ।

थ्व नां सरकारं न्हापा हे तयार यानातःगु खःसां आः तिनि सार्वजनिक यासें संसदीय सुनुवाईया छ्वःगु खः ।

सम्बन्धित बुखँ

LEAVE YOUR COMMENTS