नेवाःलिसे बाबुराम ज्याझ्वः

येँ (नेपालभाषा टाइम्स)÷वइगु निर्वाचन निगू पक्ष दथुइ द्वन्द्व जूगु खँ नेपाल समाजवादी पार्टीया अध्यक्ष डा. बाबुराम भट्टराईं धयादीगु दु । म्हिगः येँय् ग्वसाः ग्वःगु ‘नेवाः लिसे बाबुराम’ ज्याझ्वलय् न्ववायेगु झ्वलय् वय्कलं उगु खँ धयादीगु खः । ज्याझ्वलय् न्ववासें डा. भट्टराईं धयादिल, ‘आः वइगु निर्वाचन निगू पक्षीय द्वन्द्व खः, अग्रगामी शक्ति व प्रतिगामी शक्तिया दथुइ थ्व द्वन्द्व जुयाच्वंगु दु ।’

आः सत्ता गठबन्धन संविधानया रक्षा यानाः ल्यं दनिगु कार्यभारयात पूवंकेगु खः धासें वय्कलं प्रतिगामी शक्ति अझ नं संविधानयात ध्वस्त यायेत न्ह्यलिचाच्वंगु व उकिया नेतृत्व एमालेया अध्यक्ष केपी शर्मा ओलीं यानाच्वंगु द्वपं नं बियादीगु दु ।

वय्कलं देय्या निर्वाचन प्रणाली महीकं देशय् राजनीतिक स्थिरता मवइगु खँ धासें प्रत्यक्ष निर्वाचित राष्ट्रपति पूर्ण समानुपातिक निर्वाचन प्रणाली थौंया आवश्यकता जूगु खँ नं धयादीगु दु ।

येँ ७ या उम्मेदवार मानुषी यमि भट्टराई थः म्ह्याय् जुयाः जक उम्मेदवार जूगु मखु धासें वय्कलं आम जनताया दथुइ युवा उम्मेदवारया ह्विम वयाच्वंगुलिं गठबन्धन पार्टीतय्सं मानुषीयात उम्मेदवार दयेकेगु निर्णय याःगु खँ नं धयादिल ।

वय्कलं थः बारे सुनां भ्रम न्यंकाच्वंगु दुसा दकलय् अप्वः जुजुवादी व एमालेया नेता कार्यकर्तातय्सं भ्रम न्यंकाच्वंगु दु धासें धयादिल, ‘जिगु बारे सुनां नं भ्रम न्यंकेगु ज्या यानाच्वंगु दुसा जुजुवादी व एमालें यानाच्वंगु दु, उकिं नं विशेष यानाः खस आर्यया मनूतय्सं अज्याःगु भ्रम न्यंकेगु ज्या यानाच्वंगु दु ।’