ने. सं. ११४६ बछलाथ्व तृतीया - अक्षय तृतीया, भिक्षु प्रज्ञानन्द महास्थविरया १२६ क्वःगु बुदिं

कन्हय् सामाजिक दूरी कायम यासें न्हूदँ हनीगु

येँ (नेपालभाषा टाइम्स) – नेपाल संवत् ११४१ न्हूदँया लसताय् कन्हय् थीथी थासय् थीथी ज्याझ्वः याइगु जूगु दु। थुगुसी कोरोना संक्रमणया कारणं सामाजिक दूरी कायम यानाः जक ज्याझ्वः यायेगु ग्वसाः न्हूदँ समारोह समितिं यानाच्वंगु दु ।

थ्वहे झ्वलय् कन्हय् न्हूदँया लसताय् बसन्तपुली ¥याली यायेगु पलेसा राष्ट्रिय सभागृहय् सभा यायेगु तयारी जुयाच्वंगु खँ सीदुगु दु । राष्ट्रिय न्हूदँ समारोह समितिया नायः रमेश महर्जनं म्हिगः छगू वक्तव्य जारी यासें थुकिया जानकारी बियादीगु खः । वक्तव्यय् धयातः कथं सभागृहय् जुइगु ज्याझ्वलय् मूपाहां कथं प्रधानमन्त्री केपी ओली झाइगु जुयाच्वंगु दु । अथे हे न्हूदँया लसताय् थिमिया शंखधर चोकय् च्वंगु शंखधरया झ्वाताय् स्वां देछाइगु ज्याझ्वः दुगु खँ नं धाःगु दु । अन नं न्हापा थें सभा यायेगु ज्या धाःसा जुइ मखु ।

न्हूदँया लसताय् लाकाः म्हिगः न्हूदँ समारोह समिति, नेपालभाषा मंकाः खलः येँ, नेपालभाषा मंकाः खलः यल व शंखधर साख्वाः प्रतिष्ठानया मंकाः ग्वसालय् उगु ज्याझ्वः जूगु दु । भिंतुना कालबिल यायेगु ज्याखं जूगु उगु ज्याझ्वलय् मूपाहां कथं नांजाःम्ह विद्वान काशिनाथ तमोट झाःगु खः । वय्कलं नेपाल संवत्या राष्ट्रिय व सांस्कृतिक महत्व बारे कँसें नेपाःया इतिहासय् नेपाल संवत्या महत्वपूर्ण थाय् दुगु बिचाः तयादिल । न्हूदँ समारोह समितिया नायः रमेश महर्जनया अध्यक्षताय् च्वंगु उगु ज्याझ्वलय् न्ववासें नायः महर्जनं थुगुसी तिथिया विवाद वःगु खःसां नेवाःतय्सं उकियात विवाद सिबें नं समन्वयया रुपय् काःगु खँय् लसता प्वंकादिल ।

न्हूदँया लसताय् थुगुसी यल व ख्वपय् नं सामाजिक दूरी कायम यानाः थीथी ज्याझ्वःत याइगु खँ सीदुगु दु। लिसें स्वनिगलं पिने नं सामाजिक दूरी कायम यानाः चिचीधंगु ज्याझ्वःत यायेगु तयारी जुयाच्वंगु दु। नेपालं पिने थीथी देशय् स्वन्तिया लसताय् जुइगु मंकाः म्हपुजा व सभाया ज्याझ्वःत धाःसा स्थगित याःगु दु ।