पोखराय् निगू दशक लिपा धुँ जात्रा
येँ(नेपालभाषा टाइम्स)÷पोखराय् च्वंपिं स्थानीय नेवाःतय्सं झण्डै निगू दशक लिपा धुँ जात्रा पिथंगु दु । बाघजात्रा आयोजक समितिपाखें २३ दँ लिपा पोखराय् धुँ जात्रा पिथंगु खः । जात्राय् पोखराय् च्वंपिं मचांनिसें ज्याथःजिथिपिं जक मखसे ख्वप, बन्दीपुरलिसें थीथी थासं वःपिं नेवाःतय्सं नं ब्वति काःगु खः ।
परापूर्वकालय् पोखराय् धुं तसकं दुःख बिउगु व व हे धुँयात स्याःगु लुमन्तिइ धुँ जात्रा यायेगु याना वयाच्वंगु समितिं जानकारी बिउगु दु । बाघ जात्रा आयोजक समितिया सचिप सुनिल उलकं जात्राया निंतिं तःधंगु ल्याखय् कलाकारया आवश्यक जूगु व खर्च नं व हे कथं जुइगुलिं जात्रायात निरन्तरता बी मफयाः दिनाच्वंगु खँ धयादिल । आः धाःसा जात्रा संचालनया निंतिं छगू कोष हे नीस्वनाः न्यादँय् छक्वः जात्रा संचालन यायेगु योजना दुगु नं वय्कलं कनादिल ।
परापूर्वकालय् पोखराय् धुं तसकं दुःख बिउगुलिं जुजुयाके सैनिक छ्वया हयेमाल धकाः ग्वाहालि फ्वंगु व सैनिकं नं धुँयात पियाः हे स्याना बीवं जुजुलिसे लय्ताःपिं जनतां उकिया हे लुमन्तिइकथं धुँ जात्रा यायेगु याना वयाच्वंगु समितिं जानकारी बिउगु दु ।
उगु इलय् धुँ स्यायेत वःपिं सैनिकतय्सं स्वन्हु बिकाः थौंकन्हय् पोखरा रंगशाला दुथाय् धुँयात मालाः स्याःगु खः । जात्राय् नं उकथं हे न्हापांगु दिं पोखराया नेवाः छेँय् नं धुँ मालेत पिहां वःगु पुचलं मोहरिया त्वाः, बागबजाः, बाल मन्दिर स्कुल, बालधारा चोक, नालामुख चोकय् निन्हुया दिं गणेश त्वाः सिमलचौर, सिर्जनाचोक, पृथ्वीचोक, महेन्द्र पुलय् धुँयात माःगु खः । स्वन्हुया दिं हाकनं भिमसेन देगः तेर्सापट्टि, महेन्द्रपुल, रानीपौवा, माटेपानी, अमरसिंह चोक जुयाः पोखरा रंगशाला थ्यंकाः धुँ लुइकाः स्यायेवं जात्रा क्वचायेकूगु खः ।
जानकारतय्कथं २०१४ निसें भैरव त्वालं शुरु जूगु धुँ जात्रा पिथनेगु याना वयाच्वंगु खःसा २०५७ सालय् दकलय् लिपा थ्व जात्रा पिथंगु खः ।
समितिया सचिव उलकयाकथं आर्थिक अभावं दिनाच्वंगु थ्व जात्रा यायेत जक दक्वं यानाः थ्यंमथ्यं न्यासः कलाकारया आवश्यक जूगु खः स्वन्हुतक यायेबलय् खर्च नं उकथं तःधंगु मात्राय् जुइ ।
LEAVE YOUR COMMENTS