थीथी संस्था व व्यक्तित्वयात हन
नेवाः देय् दबूया स्वीछदँ बुन्हि
येँ(नेपालभाषा टाइम्स)/ नेवाः देय् दबूया स्वीछदँ बुन्हि नेवाः न्ह्यलुवा व नेवाः देय् दबूया संरक्षक मल्ल के. सुन्दरं त्वाः देवाय् मत च्याकाः उलेज्या यानादिल । ज्याझ्वलय् वय्कलं थुगुसीया नारायणदेवी समाजसेवा सिरपाः नेपालभाषा मंकाः खलः यलयात, नारायणदेवी तीर्थ व्यवसायी प्रोत्साहन सिरपाः ख्वपया पौभाः व्यवसायी पार्वती बज्राचार्ययात व गिरिधरलाल नेपालभाषा सेवा सिरपाः वरिष्ठ साहित्यकार फणिन्द्ररत्न बज्राचार्ययात लःल्हानादिल । स्वंगुलिं सिरपाःया दां छगू छगू लाखया खः ।
ज्याझ्वलय् आः नकतिनि हे जक बागमती प्रदेश सरकारया उद्योग वाणिज्य तथा प्रशासन मन्त्री नियुक्त जुयादीम्ह विन्दु श्रेष्ठ, सामाजिक विकास मन्त्री कन्चनचन्द्र बादे श्रेष्ठ व संस्कृति तथा पर्यटन मन्त्री सुरेश श्रेष्ठयात हना पौ देछासें हनेज्या नं याःगु खः । हनेज्या समारोहय् मूपाहां मल्ल के. सुन्दरं बागमती प्रदेश अन्तर्गतया सरकारी ज्याकुथिइ नेपालभाषायात लागू याकेगु निंतिं आः झिंखुगू जातिया निवेदनया नमूना न्ह्यःने तयाः छु गज्याःगु निवेदन तयेगु खः, उकियात नां, बतन जक भरे यायेगु कथं तयारी यायेमाःगु व प्रदेशया फुक्कं सुचं तामांग व नेपालभाषां नं पिथनेगु ज्या यानाः कानुन सम्मत ज्या न्ह्याकेमाःगु सुझाव बियादिल ।
प्रदेश मन्त्री कन्चनचन्द्र बादे श्रेष्ठं निरंकुशतन्त्रय् छुं मजुयाच्वंगु थासय् स्वतन्त्रता चूलायेवं फुक्कं छक्वलं याये मफइगु स्वीकार यासें आः कानुन कथं छसिकथं ज्या न्ह्यानावनीगु विश्वास प्वंकादिल । मेम्ह प्रदेश मन्त्री विन्दु श्रेष्ठं नेवाः देय् दबूया दुग्यंगु योगदानं भाषा कानून लागू जूगु धयादिसें आः प्रदेशपाखें उकियात पालना यायेत थःपिं प्रतिवद्ध जूगु खँ कनादिल । पुलांम्ह मन्त्री राजेन्द्र श्रेष्ठं थःपिंसं संविधानं मबिउबलय् हे येँ महानगरपालिका व धनुषा जिविसय् स्थानीय बाहुल्यता दुगु भाषायात ज्याखँया भाषा दयेकेगु संशोधन प्रस्ताव दर्ता यानाः ज्या यानागु लुमंकादिल । अथेहे देय् दबूया सल्लाहकार डा. पुष्पराज राजकर्णिकारं पुरस्कृत प्रतिभाया छनौट प्रक्रिया बारे न्ववानादीगु खः ।
अथेहे नेवाः देय् दबूया संरक्षक नरेश ताम्रकारं नेवाःतय्त स्यंकीपिंत खबरदारी यायेत थुगु मंकाः संगठन छप्पँ जुयाः लगे जुयाच्वनेमाःगु खँय् बः बियादिल । नेवाः देय् दबूया नायः पवित्र बज्राचार्यया सभापतित्वय् जूगु उगु ज्याझ्वलय् रसना महर्जनं मञ्जुश्री चचाः प्याखं न्ह्यब्वयादीगु खःसा ज्याझ्वलय् कुम्हाः सागर एण्ड ख्वप ब्याण्डयात नं हंगु खः ।
LEAVE YOUR COMMENTS