नातिवज्रया क्वथाय् ‘छचा जक’

थीथी विधाय् निरन्तर च्वसा न्ह्याकादीम्ह वरिष्ठ साहित्यकार गोविन्द गिरी प्रेरणाया लघु उपन्यास ‘छचा जक’ म्हिगः नेपालभाषाया साहित्यकार नातिवज्र वज्राचार्यं थःगु हे छेँ असं दगुबहालय् पितब्वज्या यानादिल।

सिर्जना अभियान भक्तपुरया ग्वसालय् पितब्वज्या जूगु उगु सफू ‘मात्र एकरात’ यात उपन्यासकार शशिकला मानन्धरं नेपालभाषां अनुवाद यानादीगु खः । उगु कृति अंग्रेजी व हिन्दी भासं नं भाय् हिले धुंकूगु दु । नुगःखँ तयेगु झ्वलय् मूपाहां बज्राचार्यं थःगु स्वास्थ्य स्वास्थ्यस्थिति बांमलानाच्वंसां नं विदेश च्वनाच्वंम्ह साहित्यकार गिरीं अतिकं हनाबना तसें थुगु ह्वःताः चूलाकादीगुलिं वय्कःयात सुभाय् व भिंतुना बियादिल ।

लसकुस न्वचु तयादिसें बाखं च्वमि ध्रुव मधिकःमिं न्ह्याकादीगु उगु ज्याझ्वलय् साहित्यकारपिं किशोर पहाडी, शङ्कर भारती, प्रमिला बज्राचार्य, राजेन्द्र रञ्जित, अमिर मैंया रञ्जित, बिजय रत्न असंबरे, नःलि बज्राचार्य, नरेश वीर शाक्य, सुगतरत्न सिन्दुराकार, लुजः बज्राचार्य, गजेन्द्र गिरीलगायत व्यक्तिपिंसं ब्वति कयादीगु खः ।