२९ क्वःखुसी अर्जेन्टिना कोपा अमेरिकाया फाइनलय्

एजेन्सी- अर्जेन्टिनां २९ क्वःखुसी कोपा अमेरिकाया फाइनलय् थाय् दयेकूगु दु । बुधवाः सुथय् ब्राजिलया नासिओनल स्टेडियमय् जूगु कासाय् अर्जेन्टिना कोलम्बियायात पेनाल्टी सुटआउटय् बुकाः फाइनलय् थ्यंगु खः । कासाया निर्धारित इलय् निगुलिं टिमं छगू छगू गोल याःगु खः । अर्जेन्टिनाया निंतिं कासाया ७ औं मिनेटय् कप्तान लियोनल मेसीया पासय् लाउराटो मार्टिनेजं गोल याःगु खः । कासाया निगूगु हाफया ६१ औं मिनेटय् कोलम्बियाया निंतिं लुइस डियाजं गोल याःगु खः ।

कासा छगू छगू गोलया बराबरी जूगुलिं पेनाल्टी सुटआउटय् वंगु खःसा पेनाल्टीइ अर्जेन्टिनां कोलम्बियायात ३–२ गोलं बुकल । अर्जेन्टिनाया निंतिं कप्तान मेसी, लाउराटो मार्टिनेज व लियानार्दो डेनियलं गोल याःगु खःसा रोड्रिगो पाउलं थ्वाःगु पेनाल्टी पोस्टं पिने लाःवंगु खः । थुखे कोलम्बियाया जुआन काउड्राडो व मिगुएल बोरजां याःगु पेनाल्टीइ जक गोल जुलसा मेगु स्वंगुलिं पेनाल्टी अर्जेन्टिनाया गोलकिपर एमिलियानो मार्टिनेजं पनाबिल । मार्टिनेजं सान्चेज, येरी मिना व एडविन कार्डोनाया पेनाल्टीइ प्रहार पंगु खः । कोपा अमेरिकाया फाइनलय् आः अर्जेन्टिनां ब्राजिललिसे म्हिती ।

अर्जेन्टिना आःतक २८ क्वः कोपा अमेरिकाया फाइनल म्हिते धुंकूगु दुसा थुकी १४ क्वः उपाधि त्याकूगु दु । अर्जेन्टिना सन् २०१९ या कोपा अमेरिकाया सेमिफाइनलय् बुइधुंकाः आःतक छगू नं कासाय् बूगु मदुनि । सन् २०१९य् अर्जेन्टिनायात ब्राजिलं बुकूगु खः । थुखे ब्राजिलयात दकलय् लिपा बुकूगु टिम नं अर्जेन्टिना हे खः । सन् २०१९ य् जूगु मेगु कासाय् ब्राजिलयात अर्जेन्टिनां बुकूगु खःसा वं धुकाः ब्राजिल नं बूगु मदुनि ।

कोपा अमेरिकाय् धाःसा ब्राजिल व अर्जेन्टिना दथुइ झिक्वः कासा जूगु दु । उकी च्याक्वः अर्जेन्टिनां व निक्वः ब्राजिल त्याःगु दु । अर्जेन्टिनां दकलय् लिपा सन् १९९३ य् कोपा अमेरिकाया उपाधि त्याकूगु खःसा ब्राजिलं सन् २०१९ य् उपाधि त्याकूगु खः ।

अर्जेन्टिनाया कासामि कप्तान मेसीया निंतिं थ्व फाइनल महत्वपूर्ण जू । मेसीं आःतक अर्जेन्टिनाया निंतिं अन्तर्राष्ट्रिय उपाधि त्याकेफुगु मदुनि । मेसीं अर्जेन्टिनायात विश्वकप व कोपा अमेरिकाया फाइनलय् तक धाःसा यंकूगु दु । मेसीं स्वक्वः तक कोपा अमेरिकाया फाइनल म्हितेधुंकूगु दु ।

सम्बन्धित बुखँ

LEAVE YOUR COMMENTS