
येँ (नेपालभाषा टाइम्स) – येँ महानगरपालिकां आवंलि नक्सा स्वीकृत याइगु इलय् विद्युतीय हस्ताक्षर (डिजिटल सिग्नेचर) प्रयोगय् हइगु जूगु दु । येँ मनपां थ्व हे वइगु साउन १ गतेनिसें भवनया नक्सा पास यायेगु इलय् विद्युतीय हस्ताक्षर प्रयोगय् हयेगु तयारी याःगु खः ।
येँ मनपाया प्रमुख प्रशासकीय अधिकृत एकनारायण अर्यालं आवंलि नक्सा पासया दक्वं प्रक्रिया ‘पेपरलेस’ जुइ धासें महानगरयाके स्मार्ट सहरया सूचकया रुपय् ज्या यायेगु क्षमतादु, स्रोत, संरचना व पूर्वाधार नं दु। उकिं छगू कम्पोनेन्टय् ज्या यायेगु तयारी यानगु खः ।
वय्कलं नक्सा दर्ता जूगु स्वीन्हुया दुने हे नक्सा स्वीकृत जूगु प्रमाणपत्र बीगु प्रणालीया विकास यानागु दु धासें सेवा कायेत ज्याकुथिइ हे वयाच्वनेमाःगु, कर्मचारी पियाच्वनेमाःगु अध्यास व मेमेगुकथंया सेवाग्राहीं फयेमाःगु झन् झटयात सुधार यायेत स्वयागु दु धयादिल ।
थुगु सेवा लागू जुइवं दरखास्तवालां छेँय् हे च्वनाः प्रणालीइ वनाः थःगु फाइल गुगु डेस्कय् वा गुम्ह अधिकारीयाथाय् थ्यंगु दु धकाः स्वये फइगु नापं विद्युतीय हस्ताक्षर कार्यान्वयनय् वयेवं दरखास्तवालां छेँय् हे च्वनाः नक्सा तकं) दर्ता याये फइगु जूगु दु। छुं गथे जुयाः आवश्यक भ्वं व मापदण्ड मगाःगु जुल धाःसा नक्सा स्वचालित प्रक्रियाय् वनी । प्रक्रियाय् वनेधुंकाः दक्वं ज्या पूवन कि दरखास्तवाला सर्जमिन यायेगु इलय् व प्रमाण पत्र कायेगु इलय् धाःसा ज्याकुथिइ हे वने मालीगु जुइ । तर बैंकय् दस्तुर बुझे यायेगु इलय् बैंक कारोबार यायेगु सुविधाकथं छेँय् वा बैकय् वनाः नं पुले फइ ।
महानगरपालिका भवन इजाजत विभागया प्रमुख सुरज शाक्यं येँ मनपा दुने निर्माण जूगु भवन, तल्ला थप, न्हूगु भवन निर्माण व संरचनाया अनिवार्य नक्सा पास यायेमाःगु धयादिल । वय्कलं महानग क्षेत्र दुने भवन निर्माण वा पुनःनिर्माण यायेबलय् महानगरपाखें अनिवार्य नक्सा स्वीकृत यायेमाःगु व उगु ज्या मयात धाःसा संरचना गैरकानुनी जुइ धयादिल ।
महानगरपालिकां भवन नक्सा स्वीकृत प्रक्रियाया हरेक चरणयात सरल, व्यवस्थित व प्रभावकारी याना यंकेगु ल्याखं वंगु २०७५ असार २७ गते भवन निर्माण मापदण्ड स्वीकृत याःगु खः । थ्व हे मापदण्डया लिधंसाय् २०७५ साउन २८ गते च्वंगु नगर कार्यपालिकाया बैठकं येँ महानगरपालिका भवन निर्माण संहिता कार्यविधि-२०७५ जारी याःगु खः ।
नक्सा स्वीकृतिया निंतिं जग्गधनी प्रमाणपत्रया प्रतिलिपि, जग्गाधनी दर्ता प्रमाण पुर्जा (फोटो मदुगु जुल धाःसा नागरिकताया प्रमाणपत्रया प्रतिलिपि), चालु आर्थिक दँय् मालपोत पुलातःगु रसिदया प्रतिलिपि, कित्ता नं. प्रष्ट जूगु प्रमाणित नक्सा (ब्लू प्रिन्टं, डिजाइनर व नक्सावालाया हस्तार लगायतया थीथी झिंप्यताजि भ्वं आवश्यक जुइ ।
LEAVE YOUR COMMENTS