मोहनिया इलय् स्वनिगःया कोरोना नियन्त्रण :  निषेधाज्ञा तयेत सिडिओत अन्योल

येँ (नेपालभाषा टाइम्स) – स्वनिगलय् कोरोना संक्रमिततय् ल्याः अप्वया वया च्वंगु व मोहनी नखःया चहलपहलं थप संक्रमण अप्वयेकीगु अवस्था वयाच्वंसां स्वनिगःया सिडिओत थन निषेधाज्ञा यायेगु कि मयायेगु धयागु खँय् अन्यौल जुयाच्वंगु दु। स्वनिगलय् महामारी तच्वया वयेवं स्वनिगःया येँ, यल व ख्वपया सिडिओतय्सं थःपिनि ज्याकू जिल्ला प्रशासन कार्यालयय् धाःसा अत्यावश्यक सेवा बाहेक मेगु फुक्क बन्द यायेधुंकूगु दु, तर जिल्लाय् हे निषेधाज्ञा जारी यायेगु खँय् धाःसा निर्णय यायेमफयाच्वंगु दु ।

सरकारं छुं नं जिल्लाय् न्यासःम्ह स्वयां अप्वः सक्रिय संक्रमितत दत धाःसा सिडिओं नं हे निषेधाज्ञा जारी यायेफइगु अधिकार बियातयेधुंकूगु दु। तर स्वनिगलय् द्वलंद्वः सक्रिय संक्रमितत दुसां स्वनिगःया सिडिओत सरकारया हे निर्देशन पियाच्वंगु दु। स्वनिगः संघीय सरकारया नं मू ज्याकू दुगु थाय् जूगुलिं सरकारया निर्देशन मवयेकं सिडिओतय्सं निषेधाज्ञाया निर्णय याये मफयाच्वंगु खँ धाःगु दु ।

येँ, यल व ख्वप जिल्लाया सिडिओतय्सं शुक्रवाः च्वंगु अन्तरजिल्ला समन्वय समितिया बैठक लिपा सिडिओ कार्यालयत बन्द यायेगु निर्णय याःगु खः । तर निषेधाज्ञा तयेगु बारे छुं सहलह मजूगु खँ सिडिओतय्सं धाःगु दु। यल जिल्लाया सहायक सिडिओ ललितकुमार बस्नेतं निषेधाज्ञा जारी जुइ वा मजुइ धयागु खँ छुं छुं विषयय् निर्भर जुइगु खँ धयादीगु दु। वय्कलं विकराल रुपं संक्रमित अप्वया वल धाःसा, संघीय सरकारया हे निर्देशन वल धाःसा हाकनं निषेधाज्ञा जारी जुइफु धयादीगु दु। वय्कलं धयादीगु दु, ‘थ्व थाय् संघीय राजधानीलिसे स्वाःगु थाय् जुयाः नेपाल सरकारं गज्याःगु निर्देशन वल व कथं निषेधाज्ञा तयेगु मतयेगु निर्णय जुइ ।’

मेखे मोहनिबलय् मनूतय् चहलपहल अप्वया संक्रमण तच्वयेफुगुलिं जनस्वास्थ्य सम्बन्धी मापदण्डय् कडाइ यायेमाःगु सुझाव जनस्वास्थ्यविज्ञतय्सं बिया वयाच्वंगु दु। थौंकन्हय् देय्न्यंकं दुपिं सक्रिय संक्रमितत मध्ये ५० प्रतिशतं मल्याक स्वनिगलय् जक दु। वंगु असोजया मसान्त तकया तथ्यां कथं येँय् १६५०६ (कूल संक्रमितया ४४ प्रतिशत), यलय् २५६६१ (४.५ प्रतिशत) व ख्वपय् १५२२ म्ह (४ प्रतिशत) संक्रिय संक्रमितत दु ।

सम्बन्धित बुखँ

LEAVE YOUR COMMENTS