निर्वाचन लिच्वः वल, आः ३५ न्हु दुने न्हूगु सरकार
येँ (नेपालभाषा टाइम्स)-निर्वाचन आयोगं राष्ट्रपति विद्यादेवी भण्डारीयात प्रतिनिधिसभा व प्रदेशसभा निर्वाचन–२०७९ या लिच्वः लःल्हाःगु दु । म्हिगः राष्ट्रपति भवन वनाः निर्वाचन आयोगया प्रमुख आयुक्त दिनेशकुमार थपलिया सहितया पदाधिकारीतय्सं निर्वाचनया मत परिणाम विवरण लःल्हाःगु खः ।
आयोगं मतपरिणाम राष्ट्रपतियात लःल्हायेवं न्हूगु सरकार गठनया नितिं लँ चाःगु दु । आयोगं वंगु बुधवाः निर्वाचनया फुक्कं लिच्वः घोषणा याःगु खः । निर्वाचनया लिच्वः कथं नेपाली कांग्रेस ८९ सिट कयाः दकलय् तःधंगु पार्टी जूगु दुसा निगूगु तःधंगु पार्टी एमालें ७८ सिट काःगु दु । उकथं हे नेकपा (माओवादी) केन्द्र ३२ सिट कयाः स्वंगूगु थासय् लाःगु दु ।
उकथं हे राष्ट्रिय स्वतन्त्र पार्टी २० सिट, राष्ट्रिय प्रजातन्त्र पार्टी १४ सिट, जसपा १२ सिट, नेकपा (ए–स) १० सिट, जनमत पार्टीं ६ सिट व लोसपां ४ सिट हःगु दु ।
आयोगं निर्वाचनया लिच्वः औपचारिक रुपं लःल्हायेवं आः राष्ट्रपति कार्यालयं न्हूगु सरकार गठनया निंतिं प्रक्रिया न्ह्याकी । संविधानया धारा ७६ (८) सं
‘निर्वाचनया अन्तिम लिच्वः घोषणा वा प्रधानमन्त्री पद रिक्त जूगु मितिं ३५ न्हुया दुने प्रधानमन्त्री नियुक्तिया प्रक्रिया पूवंकेमाःगु’ व्यवस्था दु ।
संविधानया धारा ७६ (१) य् बहुमत हःगु दलं सरकार दयेकेगु प्रक्रिया न्ह्यथनातःगु दु । तर आः छगू हे दलया बहुमत महःगुलिं धारा ७६ (२) कथं सरकार नीस्वनेगु ज्या न्ह्याइ । थ्व धारा अन्तर्गत निगू वा निगू स्वयां अप्वः दलया समर्थन काइम्हेस्यां सरकार गठन याये फइ ।
सरकार नीस्वनेगु नितिं बहुमत दुजः १३८ माः । तर कांग्रेस, माओवादी, सपा, लोसपा व राजमो सहित सत्तारुढ गठबन्धनयाके १३६ सांसद दु । गठबन्धनयात बहुमतया नितिं निम्ह सांसद मगाः । न्हापांखुसी निर्वाचन त्याःगु जनमत पार्टीं सरकारय् वनेगु निर्णय यायेधुंकूगु दु । जनमत पार्टीयाके खुम्ह सांसद दु ।
उकथं हे निर्वाचन आयोगं निर्वाचनया लिच्वः उपराष्ट्रपति नन्दबहादुर पुन व प्रधानमन्त्री शेरबहादुर देउवायात नं लःल्हाःगु दु । प्रम देउवां निर्वाचन लिच्वः लःल्हाना कायेगु झ्वलय् आयोगया पदाधिकारीपिंत निर्वाचन क्वचायेकूगुलिं सुभाय् नं देछानादीगु खः ।
LEAVE YOUR COMMENTS