नेवाः मुस्मांतय्त नेवाः भाय् स्यनीगु

येँ –  नेवाः मुस्लिम समाजं आः नेवाः मुस्मांतय्त नेपालभाषा नं स्यनेगु लागिं भाषा कक्षा सञ्चालन याइगु जूगु दु । थःपिं नेवाः खःसां नं आपालं नेवाः मुस्मांतय्सं नेवाः भाय् ल्हायेगु त्वःता वनाच्वंगुलिं आः नेवाः भाय्या कक्षा न्ह्याकेगु योजना दयेकूगु खँ समाजया अध्यक्ष निसार मुद्दिन नं ‘नेपालभाषा टाइम्स’ यात कनादिल ।

थःपिंसं नेवाः भाय् बांलाक थूसां नं ब्वनेत व लिसः बीत धाःसा समस्या जुयाच्वंगु दु धासें थ्व समस्या मदयेकेत नेवाः भाय् स्यनीगु कक्षा न्ह्याकेत तयारी यानाच्वनागु खँ वय्कलं कनादिल । वय्कःया कथं नेवाः मुस्लिम समाज नीस्वनेधुंकाः आपालं नेवाः मुस्मांतय्सं नेपालभाषा स्यनेगु लागिं कक्षा सञ्चालन यायेत बः बिउगुलिं थःपिंसं नेवाः देय् दबू नाप समन्वय यानाः नेपालभाषा कक्षा न्ह्याकेगु तयारी यानाच्वनागु खँ वय्कलं कनादिल ।

वय्कलं धयादी, ‘न्हापा जिमि बाज्या, अबुपिंसं ला नेपालभाषा बांलाक हे ल्हायेगु याना वयाच्वंगु खः, तर आः स्कुलय् खस भासं ब्वनेमाःगु हुनिं जिमिसं नेवाः भाय् बांलाक थूसां नं लिसः बीत थाकुगुलिं नेपालभाषाया कक्षा न्ह्याकेगु सोच दयेकूगु खः ।’स्वनिगःया थीथी थासय् च्वंपिं नेवाः मुस्लिमत जानाः लत्या न्ह्यः थ्व समाज नीस्वंगु खः ।

नेपालभाषा टाइम्स

च्वमिया मेमेगु

• भाषासेवी विष्णु चित्रकार मंत, कन्हय् जगतसुन्दर ब्वनेकुथिइ अन्तिम श्रद्धाञ्जलीया निंतिं तइगु
• कुमारी छेँया त्वरं पुनर्स्थापना (भिडियाे रिपाेर्ट)
• बोस्टनय् सक्वया सम्पदाया चित्रकला ब्वज्या
• एनपीपीएया नायः पदय् शान्ति श्रेष्ठ
• समाजसेवी दिलबहादुर मानन्धर मंत