ने. सं. ११४३ चौलाथ्व पारू -

नेपालभाषां ब्वंकीगु स्थानीय पाठ्यक्रम : येँ देय्या प्रधानाध्यापकतय् सहमति

येँ (नेपालभाषा टाइम्स) – नेपालभाषाया माध्यमं स्थानीय विषय ब्वंकेगु येँ महानगरपालिकाया निर्णय कार्यान्वयन याना यंकेगु लागिं थःपिंसं ग्वाहालि यायेगु बचं थीथी स्कूलया प्रधानाध्यापकतय्सं बिउगु दु। स्थानीय विषय नेपालभाषां ब्वंकेगु निर्णय कार्यान्वयन यायेगु बारे येँ मनपा शहरी योजना आयोगपाखें थीथी स्कूलया प्रधानाध्यापकतलिसे याःगु सहलह ज्याझ्वलय् वय्कःपिंसं थ्व बचं बियादीगु खः ।

ज्याझ्वलय् न्ववासें स्थानीय विषयया उगु पाठ्यक्रम दयेकादीम्ह डा. चुन्दा वज्राचार्यं थ्व विषय थ्वहे येँ मनपा दुनेया हे थाय्बाय्, नसात्वँसा, नखःचखः बारे च्वयातःगु जूगुलिं थ्व ब्वंकेत छुं हे थाकु मजुइगु बिचाः तयादिल । वय्कलं थ्व विषय ब्वंकीम्ह शिक्षक नेवाः हे जुइमाः धइगु मदु, तालिम बिल धाःसा गैर नेवाःतय्सं नं थ्व ब्वंके फइगु खँ नं कनादिल ।

अथे हे पाठ्यक्रम दयेकादीम्ह मेम्ह दुजः वरुणप्रसाद वैद्यं थ्व विषय ब्वंकेगु लागिं थःपिंसं शिक्षकतय्त तालिम बीत्यनागु खँ कँसें उगु तालिम कायेधुंकल कि विषय ब्वंकेत सहज जुइगु खँ कनादिल । हरेक स्कूलय् छम्ह शिक्षकं न्यागू पिरियड ब्वंकेगु ल्याखं थःपिंसं तालिम बीगु खँ नं वय्कलं कनादिल । अथे हे मेम्ह दुजः नरेशवीर शाक्यं थ्व विषय ब्वंकाः महानगरपालिकां गैर नेवाःतय्त नं नेवाः दयेकेत्यंगु मखु, केवल नगर बारे
जानकारी बीगु ज्या जक यायेत्यंगु खः धयादिल ।

ज्याझ्वलय् ज्ञानोदय माविया प्रधानाध्यापक नातिकाजी महर्जनं महानगरपालिकां तयार याःगु थ्व पाठ्यक्रम वास्तवय् गैर नेवाःतय्त मनपा बारे जानकारी बीगु लागिं झन हे ब्वंकेमाः धयादिल । वय्कलं धयादिल, ‘मनपा स्थानीय सरकार खः, सरकारं याःगु निर्णय पालना याये मखु धायेगु उचित मखु।’

पञ्चकन्या आधारभूत माविया प्रअ विनिता रंजितं छुं मसिउपिं मस्तय्त अंग्रेजी ला पोख्त जुइक ब्वंकेफु धाःसा नेपालभाषा ब्वंके मफइगु खँ हे मदु धासें उकिया लागिं शिक्षक व्यवस्थापन बांलाक जुइमाः धयादिल ।

प्रभात माविया प्रअ राजेश्वर श्रेष्ठं हरेक स्कूलय् नेवाः भाय् सःपिं शिक्षकतय्त हे थुकी सक्रिय यायेमाः धासें थुकिया अनलाइन कक्षा नं सञ्चालन यायेमाःगु बिचाः तयादिल । गीतामाता माविया प्रअ हरि श्रेष्ठं चिचीधिकःपिं मस्तय्त चिचीधंगु हे खँ स्यनाः थ्व विषय ब्वंकेगु ज्या जुइमाः धयादिल ।

सरश्वती निकेतनया प्रअ रविना महर्जनं येँ मनपाया थ्व निर्णय ऐतिहासिक खः धासें थुकियात सफल याये हे माः धयादिल । विश्वनिकेतन माविया प्रअ हेरम्बबहादुर कँडेलं येँ देय्या जानकारी बीत थ्व पाठ्यक्रम दयेकूगु तसकं बांलाः तर थौंकन्हय् स्कूलय् नेवाः विद्यार्थीत म्हो जुया वनाच्वंगु कारणं नेपालभाषां ब्वंकेगु धाःगुलिं शुरुइ छुं भचा समस्या वइगु खः लाकि धकाः शंका प्वंकादिल ।

येँ मनपा शिक्षा विभागया अधिकृत मोति खनालं येँ देय् बारे येँया हे भाषां सयेके सीके याये खनीगु बांलाःगु हे खँ खः धासें थप छगू भाषा सयेकां छुं हे हानी जुइ मखु धयादिल । अथे हे शिक्षा विभागया निमित्त प्रमुख तारापति खरेलं मनपां तयार याःगु नेपालभाषाया थ्व पाठ्यक्रम लागू याना यंकेगु सवालय् छुं भचा चुनौती वइगु खनेदुसां मनपां उकिया सामना यानाः न्ह्याः वनी धइगु प्रतिवद्धता प्वंकादिल ।

ज्याझ्वलय् मनपा शहरी योजना आयोगया दुजः गुजेश्वरी श्रेष्ठं सहजीकरण यानादीगु खः ।