टिकापुर घटना ः थारु विद्रोह दिवसकथं हन
येँ (नेपालभाषा टाइम्स)÷च्यादँ न्ह्यः कैलालीया टिकापुरय् जूगु थरुहट थारुवान आन्दोलनयात थारु कल्याणकारिणी सभा व थरुहट थारुवान संयुक्त संघर्ष समितिं विद्रोह सभाया रुपय् म्हिगः लुमंकूगु दु । २०७२ साल भदौ ७ गते कैलालीया टिकापुरय् थरुहट÷थारुवान आन्दोलनया झ्वलय् थारु समुदाययात जूगु आक्रमणयम विरुद्ध टिकापुर विद्रोह सभाया रुपय् न्यायेकूगु खँ कल्याणकारिणी सभाया सुमन चौधरीं कनादीगु दु ।
म्हिगः विद्रोह सभाया झ्वलय् टिकापुर घटनाय् ल्हाः दुपिं धकाः थीथी नेतातय्त तयातःगु झुठा मुद्दा लित कायेमाःगु व थारु कल्याणकारिणी सभा लगायत थारु संघसंस्थातलिसे थीथी इलय् जूगु सम्झौता कार्यान्वयन यायेत नं माग याःगु खः ।
थारु कल्याणकारिणी सभाया महामन्त्री प्रेमीलाल चौधरीं टिकापुर घटनाय् दोषी ठहर जुयाः जेलय् च्वनाच्वंपिंत त्वःतेमाःगु माग यानादगिु दु । टिकापुर घटना थारु समुदायया हक अधिकार व पहिचान स्थापित यायेत जूगु आन्दोलन खः धासें तर राज्यं थारुतय्त चरम दमन याःगु व अधिकार फ्वनेवं जेलय् तःगु खँ नं वय्कलं धयादिल ।
नेपाल आदिवासी जनजाति विद्यार्थी महासंघया अध्यक्ष चन्द्रप्रसाद चौधरीं टिकापुर घटनायात गम्भीर रुपय् मकाल धाःसा हाकनं मेगु विद्रोह जुइ फइगु ख्याच्वः बियादीगु दु ।
म्हिगः कैलालीया टिकापुरय् ग्वसाः ग्वःगु ज्याझ्वलय् थारु न्ह्यलुवा लिसें थीथी राजनीतिक दलया नेतातय्सं नं ब्वति काःगु खः । ब्वति काःपिं नेतातय्सं टिकापुर घटनायात राज्यं राजनीतिक घटनाया रुपय् कयाः फुक्कं बन्दीतय्त त्वःतेमाःगु माग याःगु खः ।
संविधान दयेकेगु झ्वलय् थरुहट थारुवानयात बिस्कं प्रदेश जुइमाःगु माग यासें कैलालीया टिकापुरय् थारु समुदायं आन्दोेलन याःगु खः । उगु आन्दोलनया झ्वलय् नेपाल प्रहरीया एसएसपी सहित न्हय्म्ह सुरक्षाकर्मी व छम्ह मचा सीगु खः ।
थ्वहे झ्वलय् म्हिगः नागरिक उन्मुक्ति पार्टीया संरक्षक रेशम चौधरीं टिकापुर घटनाय् लानाः मदुम्ह मचा टेकबहादुर साउदया झ्वाता उलेज्या यानादीगु दु । चौधरी व टेकबहादुर साउद स्मृति प्रतिष्ठानं मंकाः कथं झ्वाता स्थापना याःगु खःसा टेकबहादुर साउदया बाज्या जंग साउद, भूमि व्यवस्था, सहकारी तथा गरिबी निवारण मन्त्री रन्जिता श्रेष्ठ व मचाया मांअबुपिंसं मंकाः कथं झ्वाता उलेज्या याःगु खः ।
LEAVE YOUR COMMENTS