अंगुलीमालया बारे संकिपा दयेकीगु

थिमि – बौद्धकालीन जातक बाखंया लिधंसाय् ‘अंगुलिमाल’ सकिपा निर्माण याइगु जूगु दु । फोएसजी प्रोडक्सन व एए स्टार मिडियाया मंकाः ब्यानरय् खय् भासं उगु संकिपा निर्माण यायेत्यंगु खः ।

थन जूगु छगू ज्याझ्वःया दथुइ संकिपा निर्माण यायेगु घोषणा यासें संकिपाया च्वमि व निर्माता दथुइ सम्झौता पती ल्हाःचिं तयेगु ज्या जूगु खः । थुगु संकिपा वइगु मोहनि व स्वन्तिया दथुइ शुभमुहूर्त यायेगु ज्याझ्वः दुगु संकिपाया निर्माता सुरेन्द्र श्रेष्ठं जानकारी बियादिल ।
बुद्धकालीन इलय् हिंसाया लँपु नालाकाःम्ह अंगुलीमालयात तथागत गौतम बुद्धं सद्मार्गय् वनेत प्रेरित यानाबिज्याःगु बाखंया लिधंसाय् दयेकेत्यंगु संकिपायात ल्याय्म्हनिसें ज्याथजिथिपिंसं नं ययेकीकथं निर्माण यायेगु योजना दुगु निर्माता श्रेष्ठं कनादिल ।

संकिपाया निंतिं कलाकार ल्ययेगुनिसें संकिपाया निंतिं आवश्यक एनिमेसन, भीएफएक्स व मेमेगु प्राविधिक पक्ष सशक्त यायेगु ल्याखं ज्या जुयाच्वंगु दु ।

बुद्ध नेपालय् जन्म जूगु खःसां अन्तर्राष्ट्रिय ख्यलय् उकिया गलत प्रचार जुयाच्वंगु धासें खय् भासं निर्माण जुइगु व भगवान बुद्धलिसे सम्बन्धित थुगु संकिपां बुद्धया जन्मभूमि बारे ब्वलनाच्वंगु भ्रमयात हुइत ताःलाःगु दावी संकिपाया निर्देशक अभय डंगोलया दु । एनिमेसन यानाः संकिपा निर्माण यायेमाःगु जूगुलिं फिल्मया प्रि–प्रोडक्सन, प्रोडक्सन व पोस्ट प्रोडक्सनया निंतिं म्होतिं नं निदँया ई काइगु वय्कलं धयादिल । संकिपाया बाखं शिक्षासेवी रामेश्वर भुजूं च्वयादीगु खः ।

ज्याझ्वलय् नेपाल साहित्य मन्दिरया नायः तिलकप्रकाश कायस्थ, संकिपा निर्माण कम्पनीया कानूनी सल्लाहकार मुकुन्दकृष्ण श्रेष्ठ, प्रकाशक इन्द्रकृष्ण श्रेष्ठ लगायतं संकिपा निर्माण थीथी पक्षयात कयाः नुगःखँ तयादीगु खः ।

सम्बन्धित बुखँ

LEAVE YOUR COMMENTS