आन्दोलनय् ब्वति मकाःम्हेसिया नां सिफारिसय् !

येँ (नेपालभाषा टाइम्स) – राष्ट्रिय मानव अधिकार आयोगं थीथी स्रोतं आयोग व छानबिन समितिइ वःगु सुचंया आधारय् जेनजी आन्दोलनया आह्वानकर्ता, अभियन्ता व समर्थकतय् नां दुथ्याकागु खँ धाःगु दु । आयोगं सर्वोच्च अदालतय् लिखित लिसः छ्वसें थ्व खँ धाःगु खः ।

राष्ट्रिय मानव अधिकार आयोगं वंगु महिनाय् जेनजी आन्दोलनया बारेय् मानव अधिकार उल्लंघन सम्बन्धि प्रतिवेदनया सिफारिस सार्वजनिक याःगु खः । सिफारिसया पेज नं. २१ य् प्रदर्शन आह्वानकर्ता, अभियन्ता व समर्थक समेत धकाः थःगु नां दुथ्याकूगु धासें दिपक बोहरां आपत्ति प्वंकूसें सर्वोच्च अदालतय् मुद्दा तःगु खः ।

मानव अधिकार आयोगं सिफारिस याःगु पतिइ राष्ट्रिय स्वतन्त्र पार्टीया सांसद सुलभ खरेल, बब्लु गुप्ता, डा. तोसिमा कार्की, राजिव खत्री व बोहोराया नां दुथ्यानाच्वंगु दु । उमिसं जेनजी आन्दोलनया झ्वलय् ‘आन्दोलनयात उत्तेजित यायेत भूमिका म्हितूगु द्वपं बिसें थप अनुसन्धान यायेमाःगु सिफारिस याःगु खः । बोहरां आन्दोलनय् थम्हं ब्वति मकयागु अवस्थाय् मानवअधिकार आयोगं थप अनुसन्धान यायेत सिफारिस याःगु धासें सर्वोच्चय् रिट तःगु खः ।

बोहरां वंगु भदौ २३ व २४ गते थः जहानया वासः यायेगु झ्वलय् अस्पतालय् दुगु व अनं गनं नं वनेमखंगु अवस्थाय् आन्दोलन भड्के यायेगु ज्या दुथ्याःगु द्वपं सहित आयोगं सिफारिस सार्वजनिक याःगु गलत जूगु दावी याःगु खः । बोहरां प्रतिवेदनं थःगु नां चीकेत व प्रतिवेदनय् नां दुथ्याःगु आधारय् थःत गुगुं नं कथंया कारबाही मयाकेत माग यासें सर्वोच्चय् रिट तःगु खः । रिटयात कयाः प्रारम्भिक सुुनुवाइ लिपा सर्वोच्च आयोगया नामय् कारण देखाउ आदेश जारी यःगु खः ।