ने. सं. ११४३ तछलाथ्व दशमी -

त्वाः खलः ओमबहाःया त्वाःछेँया जग स्वन

येँ- येँ महानगरपालिका वडा नं. २३ ओमबहाःस्थित त्वाः खलः ओमबहाःया त्वाःछेँया जग स्वनेगु ज्या जुल । येँ महानगरपालिकाया प्रमुख विद्यासुन्दर शाक्यं जग स्वनादीगु खः ।

येँ मनपा प्रमुख शाक्यं मूर्त, अमूर्त सम्पदाया पुनःनिर्माण, संरक्षण, संवद्र्धन यायेगु ज्या महानगरपालिकाया खः धासें माग जूकथंया सकतां योजनाय् महानगरपालिकां आर्थिक दायित्वया भारवहन यानागु दु धयादिल ।

‘झीगु सम्पदाया संरक्षण झीसं हे यायेमाः, थुकियात ल्यंकेगु दायित्व नं झीगु हे खः’, येँ मनपा प्रमुख शाक्यं धयादिल, ‘थ्व दायित्वयात थुइकाः थःपिंसं भूमिका म्हिता वयाच्वनागु दु । यदि जिमिसं यानाच्वनागु ज्याखँय् चित्त बुझे मजूगु वा थुइके मफुगु छुं दुसा सहलह यायेत झासँ । तर खँ मथुइकुसे न्ह्यःने लाःथे नवानाबिल धाःसा उकिं मेगु अर्थ लगे जुइ । भ्रम ब्वलंकेगु ज्या यानादीमते ।’

रानीपुखूया सन्दर्भय् नं अथे जूगु व आः वयाः कमलपुखूया विषयय् नं उकथं हे भ्रम न्यंकेगु ज्या जुयाच्वंगु धासें वय्कलं शहरी लागाया दुनेया पहिचान धइगु हे अनया मूर्त अमूर्त सम्पदा व जीवन्त संस्कृति जूगुलिं सम्पदाया सवेदनशीलायात थुइकाः प्रतिक्रिया बियादीत नं इनाप यानादिल ।

वडाअध्यक्ष मचाराजा महर्जनं वडा दुने माग जुयाः वइगु छुं नं कथंया योजनायायात थातिं तयेगु ज्या जुइमखु धासें सम्पदा बचे यायेत, शहरी सुविधा थ्यंकेत व विपदया इलय् प्रतिकार्ययया ज्या यायेगु दुनेया शहरी लागाया दुनेया वडाया प्राथमिकताय् लाःगु ज्या खः धयादिल । त्वाःछेँपाखें जग्गा न्यानाः प्राप्त याःगु ३ आना जग्गाय् प्यतँत्या तल्लाया उगु छेँ १ करोड ३९ लाख लागतय् निर्माण यायेत्यंगु खःसा निर्माण पक्षं खरिद प्रक्रियाय् ८६ लाखं निर्माण यायेगु कबुल याःगु व वहे कथं सम्झौता नं जुइधुकूगु ज्याझ्वलय् जानकारी बिउगु दु ।