ने. सं. ११४४ ञलाथ्व पुन्हि - येँया: पुन्हि

थुगुसी बाल्टिमोरय् येँय् थें च्वंगु यँयाः

येँ – येँय् तःजिक न्यायेकीगु यँयाः पर्व अमेरिका व बेलायतया थीथी थासय् नं न्यायेका वयाच्वंगु ला तःदँ हे दयेधुंकल । तर थुगुसी अमेरिकाया बाल्टिमोरय् छगू विशेष ज्याझ्वः यासें मुक्कं जात्रा हे थें च्वंक यँयाः पर्व हनीगु जूगु दु । उकिया लागिं घिमिरे होम्स नांगु छगू संस्था पर्व आयोजनाया जिम्मा कयाः व्यापक तयारी समेत यानाच्वंगु दु ।

अमेरिकाया मेमेगु थीथी राज्य व शहरय् पुचः पुचः मुनाः यँयाः न्यायेकेगु याःसां दकलय् अप्वः नेपाःमितय्गु बसोवास दुगु बाल्टिमोरय् यँयाः न्यायेकेत्यंगु धाःसा थ्वहे न्हापांखुसी खः । थ्व यँयाः पर्वय् लाखे, पुलुकिसि पिकायेगुया नापनापं कुमारीया रथ समेत सालीगु खँ ग्वसाः खलकं धाःगु दु ।

अथे हे थ्व पर्वय् समय्ब्व छायेगु, ला छकू वयेक समय्बजि धकाः म्येँ हालेगु, हाथु हायेकेगु व नेवाः भ्वय् नकेगु ज्या तकं जुइगु खँ धाःगु दु । लिसें पर्वय् नेवाःतय् थीथी बाजं थानाः सांस्कृतिक ज्याझ्वः नं जुइगु ग्वसाः दु । थ्वहे वइगु सेप्टेम्बर २३ कुन्हु थ्व पर्व हनी । थुगुसी भारतया सिक्किमय् जुइगु यँयाः पर्वय् ब्वति कायेगु लागिं येँया छगू पुचः नं उखे वनेत्यंगु दु ।

अमेरिकाय् सवा लख मत

अमेरिकाय् नेवाः संस्कार व संस्कृति प्रवद्र्धन यायेगु झ्वलय् वंगु वालय् नेवाः परम्परा कथं सवा लख मत च्याकेगु ज्या नं जुल । वाशिंगटनया नृत्यमण्डल विहारय् नेवाःत मुनाः सवा लख मत च्याकेगु ज्या जूगु खः । थ्व स्वयां न्ह्यः अन सवा लख मत छाय् च्याकी धइगु बारे छगू प्रवचन ज्याझ्वः यासें अज्याःगु मत दयेकेगु तालिम बीगु ज्या समेत जूगु खँ भाजु दया शाक्यं कनादिल । अमेरिकाय् अथे सवा लख मत च्याकेगु ज्या जूगु नं थ्व न्हापांखुसी खः ।